దిల్లీ-ఎన్‌సీఆర్‌లో మహిళల భద్రతపై సుప్రీంకోర్టు ఆగ్రహం..

దిల్లీ-ఎన్‌సీఆర్‌ ప్రాంతంలో ఇటీవల చోటుచేసుకున్న వరుస అత్యాచార, లైంగిక దాడుల ఘటనలపై సుప్రీంకోర్టు తీవ్ర ఆందోళన వ్యక్తం చేసింది. మహిళల భద్రతకు సంబంధించిన చర్యలు కేవలం కాగితాలకే పరిమితం కాకూడదని స్పష్టం చేసింది. రాత్రివేళల్లోనూ దిల్లీ-ఎన్‌సీఆర్‌లో మహిళలు రోడ్లపై, మెట్రో వంటి ప్రజా రవాణా వ్యవస్థల్లో భయంలేకుండా ప్రయాణించే పరిస్థితులు కల్పించాలని సూచించింది. నేరం జరిగిన తర్వాత తీసుకునే చర్యల కంటే.. ఇలాంటి ఘటనలు జరగకుండా ముందుగానే కట్టడి చేయడమే అత్యంత ముఖ్యమని న్యాయస్థానం పేర్కొంది.

మహిళలపై నేరాలకు పాల్పడే వారిలో చట్టంపై భయం కలిగేలా కఠిన చర్యలు తీసుకోవాలని సుప్రీంకోర్టు సూచించింది. బహిరంగ ప్రదేశాల్లో నిరంతర పెట్రోలింగ్‌ను పెంచాలని, సీసీటీవీ కెమెరాలు ఎప్పటికప్పుడు పనిచేసేలా చూడాలని ఆదేశించింది. దిల్లీలోని ఓ పార్క్‌లో 17 ఏళ్ల బాలికపై సామూహిక అత్యాచారం జరిగిన ఘటనతో పాటు, స్వరూప్‌ నగర్‌లో ఓ టీనేజీ బాలికపై సామూహిక లైంగిక దాడి అనంతరం హత్య, స్లీపర్‌ బస్సులో మైనర్‌ బాలికపై లైంగిక దాడి వంటి ఘటనలను పరిగణనలోకి తీసుకున్న న్యాయస్థానం.. ఈ కేసులపై సుమోటోగా విచారణ చేపట్టింది.