‘రూహ్’తో మరోసారి హారర్ జానర్‌లోకి ఇమ్రాన్ హష్మీ

బాలీవుడ్ స్టార్ నటుడు ఇమ్రాన్ హష్మీ మరోసారి తనకు ఇష్టమైన హారర్ జానర్‌లోకి అడుగుపెడుతున్నారు. ‘రూహ్’ అనే కొత్త చిత్రంతో ప్రేక్షకులను భయపెట్టేందుకు సిద్ధమవుతున్నారు. తాజాగా ఈ సినిమా ఫస్ట్ లుక్ పోస్టర్‌ను విడుదల చేసిన మేకర్స్, 2027లో థియేటర్లలోకి తీసుకురానున్నట్లు ప్రకటించారు. హిందీతో పాటు తెలుగు, తమిళ భాషల్లోనూ ఈ హారర్ థ్రిల్లర్ విడుదల కానుంది. ఫస్ట్ లుక్ పోస్టర్‌లో చెట్టు ఊడల మధ్య నుంచి ఒక కన్ను తెరిచి చూస్తున్నట్లుగా ఇమ్రాన్ హష్మీ భయంకరమైన లుక్‌లో కనిపిస్తున్నారు. ఈ సినిమా గురించి ఇమ్రాన్ మాట్లాడుతూ, తన చిత్రాల్లోని పాటలు ఎప్పుడూ ప్రేక్షకులతో ప్రత్యేకమైన అనుబంధాన్ని ఏర్పరుస్తాయని, ‘రూహ్’లోనూ అదే మ్యాజిక్ పునరావృతం కానుందని ఆశాభావం వ్యక్తం చేశారు.

నిర్మాత కుమార్ తౌరానీతో మరోసారి కలిసి పనిచేయడం ఆనందంగా ఉందని ఇమ్రాన్ తెలిపారు. ఈ చిత్రంలో సంగీతం కేవలం పాటలకే పరిమితం కాకుండా, కథలోని ఆత్మను, గాఢమైన ప్రేమను, భయానక వాతావరణాన్ని ప్రతిబింబించేలా ఉంటుందని వివరించారు. మయాంక్ శర్మ దర్శకత్వం వహిస్తున్న ఈ చిత్రానికి విశాల్ కపూర్, మయాంక్ శర్మ కథను అందించారు. హారర్, రొమాన్స్ అంశాల కలయికతో ఈ సినిమాను మ్యూజికల్ ఫీస్ట్‌గా రూపొందిస్తున్నారు. టిప్స్ ఫిలిమ్స్, టిప్స్ మ్యూజిక్ అధినేత కుమార్ తౌరానీతో కలిసి ఇమ్రాన్ హష్మీ ఈ చిత్రాన్ని నిర్మిస్తున్నారు. ఇమ్రాన్ తొలి చిత్రం ‘ఫుట్‌పాత్’ నుంచి తమ మధ్య మంచి అనుబంధం ఉందని, ఇప్పటివరకు ఎన్నో విజయవంతమైన ప్రాజెక్టులు అందించామని కుమార్ తౌరానీ తెలిపారు. ‘రూహ్’తో మరోసారి ఆ విజయాన్ని పునరావృతం చేస్తామని ఆయన ఆశాభావం వ్యక్తం చేశారు.