శబరిమలలో సరఫరా సమస్యలు.. నెయ్యి కొరతపై బోర్డు కీలక ప్రకటన

శబరిమల అయ్యప్ప స్వామి దర్శనానికి భక్తుల రాక పెరుగుతున్న వేళ ఆలయంలో నెయ్యి కొరత ఏర్పడింది. ఈ విషయాన్ని ట్రావెన్‌కోర్‌ దేవస్థానం బోర్డు (టీడీబీ) అధ్యక్షుడు జయకుమార్‌ స్వయంగా వెల్లడించారు. నెయ్యి నిల్వలు తగ్గడం ఆందోళన కలిగిస్తోందని, అదనపు నిల్వలను సమకూర్చేందుకు చర్యలు చేపట్టినట్లు తెలిపారు. అయ్యప్ప ఆలయ తీర్థయాత్ర సీజన్‌కు ముందు నిర్వహించిన బోర్డు సమావేశం అనంతరం సోమవారం ఆయన విలేకరులతో మాట్లాడారు. అయితే, భక్తులకు అందించే అరవణ, అప్పం ప్రసాదాలకు ఎలాంటి కొరత లేదని స్పష్టం చేశారు.

ఇటీవల శ్రీ చితిర అట్ట విశేషం సందర్భంగా ఆలయాన్ని తెరిచిన సమయంలో కొన్ని సమస్యలు ఎదురైనట్లు జయకుమార్‌ అంగీకరించారు. అప్పాల తయారీలో జాప్యం, కొన్ని ప్రాంతాల్లో నీటి సరఫరా సమస్యలు తలెత్తినట్లు వివరించారు. గతేడాది ఒప్పందాలు అక్టోబరు 31తో ముగియడం, కొత్త ఒప్పందాలు ఇంకా అమల్లోకి రాకపోవడమే ఇందుకు కారణమని తెలిపారు. ప్రస్తుతం అప్పం, అరవణ తయారీపై ఎలాంటి ఆందోళన లేదని, నెయ్యి నిల్వలను పెంచడంపైనే బోర్డు ప్రధానంగా దృష్టి సారించిందని పేర్కొన్నారు.