ఎల్‌నినో, వాతావరణ మార్పులపై గ్లోబల్‌ సమిట్‌లో కీలక చర్చలు

హైదరాబాద్‌లో డిసెంబర్‌ 7 నుంచి జరగనున్న గ్లోబల్‌ సమిట్‌లో భాగంగా రెండు రోజులపాటు అంతర్జాతీయ వాతావరణ సదస్సును నిర్వహించనున్నట్లు నీటిపారుదల శాఖ మంత్రి ఉత్తమ్‌కుమార్‌రెడ్డి వెల్లడించారు. సోమవారం సచివాలయంలో సదస్సు ఏర్పాట్లపై అధికారులతో ఆయన సమీక్ష నిర్వహించారు. ఎల్‌నినో ప్రభావాలను ఎదుర్కొనేందుకు ముందస్తు సన్నద్ధత, వాతావరణ మార్పులను తట్టుకునే సామర్థ్యం పెంపు, హరిత పెట్టుబడులు వంటి అంశాలకు సదస్సులో ప్రాధాన్యం ఇవ్వనున్నట్లు తెలిపారు. దేశవిదేశాలకు చెందిన వాతావరణ నిపుణులు, పర్యావరణ పరిరక్షణలో చురుకుగా ఉన్న హాలీవుడ్‌, బాలీవుడ్‌ ప్రముఖులను ఆహ్వానించాలని అధికారులకు సూచించారు. కేంద్ర మంత్రులతోపాటు నార్వే, డెన్మార్క్‌, స్వీడన్‌ తదితర దేశాల రాయబారులను ఆహ్వానించే ప్రతిపాదన ఉన్నట్లు పేర్కొన్నారు.

వాతావరణ మార్పుల ప్రభావంతో ఇబ్బందులు ఎదుర్కొనే వర్గాలకు అండగా నిలవడం, వ్యవసాయం, భద్రత, ప్రజల జీవనోపాధిపై సదస్సులో చర్చించాలని మంత్రి సూచించారు. వేసవిలో పశుగ్రాసం, తాగునీటి కొరత రాకుండా ముందస్తు చర్యలు తీసుకోవాలని, పెరిగే విద్యుత్‌, నీటి అవసరాలకు అనుగుణంగా ప్రణాళికలు సిద్ధం చేయాలని అధికారులను ఆదేశించారు. వేసవి తీవ్రత అధికంగా ఉండే నెలల్లో సహాయక చర్యల కోసం నెలకు రూ.వెయ్యి కోట్లు కేటాయిస్తామని ముఖ్యమంత్రి ప్రకటించిన నేపథ్యంలో తగిన వ్యూహాలు రూపొందించాలని తెలిపారు. రాష్ట్రంలో చేపట్టిన భూగర్భ జలాల పునరుద్ధరణ, సూక్ష్మసేద్యం, నేల సంరక్షణ కార్యక్రమాలను అంతర్జాతీయ సదస్సులో ప్రదర్శించాలని సూచించారు. ఈ సమావేశంలో ప్రత్యేక ప్రధాన కార్యదర్శి జయేశ్‌ రంజన్‌, అటవీశాఖ ప్రధాన సంరక్షణ అధికారి వినయ్‌కుమార్‌, ట్రాన్స్‌కో ఎండీ కృష్ణ భాస్కర్‌ తదితరులు పాల్గొన్నారు.