నోయిడాలో విషాదం.. 43వ అంతస్తు నుంచి దూకి యువకుడి మృతి...

ఉత్తరప్రదేశ్‌లోని నోయిడా సెక్టార్‌ 94లో విషాద ఘటన చోటుచేసుకుంది. సూపర్‌నోవా సొసైటీలోని 43వ అంతస్తు నుంచి ఓ యువకుడు కిందపడటంతో మృతి చెందాడు. అతడు ఘటనకు ఒక రోజు ముందు అక్కడ ఓ గదిని అద్దెకు తీసుకున్నట్లు పోలీసులు తెలిపారు. శనివారం గదిని ఖాళీ చేయాల్సి ఉండగా.. అంతలోనే ఈ ఘటన చోటుచేసుకుంది. తీవ్ర గాయాల కారణంగా యువకుడు అక్కడికక్కడే ప్రాణాలు కోల్పోయినట్లు సమాచారం.

మృతుడు హరియాణాకు చెందిన వ్యక్తిగా పోలీసులు గుర్తించారు. వ్యక్తిగత సమస్యల కారణంగా అతడు తీవ్ర ఒత్తిడిలో ఉన్నట్లు ప్రాథమిక దర్యాప్తులో వెల్లడైనట్లు పోలీసు వర్గాలు తెలిపాయి. ఘటనకు ముందు అతడు తన తండ్రికి పలుమార్లు ఫోన్ చేసినట్లు పేర్కొన్నారు. ఘటనను గమనించిన ఓ వ్యక్తి అతడిని కాపాడేందుకు ప్రయత్నించినప్పటికీ ఫలితం లేకపోయింది. ఘటనపై పోలీసులు కేసు నమోదు చేసి దర్యాప్తు చేస్తున్నారు.