హనీట్రాప్‌ కేసులో నేవీ ఉద్యోగి అరెస్ట్‌

ఆంధ్రప్రదేశ్‌ పోలీస్‌ కౌంటర్‌ ఇంటెలిజెన్స్‌ సెల్‌ అధికారులు 31 ఏళ్ల భారత నేవీ ఉద్యోగి ప్రదీప్‌ ముఖర్జీని కోయంబత్తూరులో అరెస్ట్‌ చేశారు. పాకిస్థాన్‌ గూఢచార సంస్థతో సంబంధాలున్నట్లు అనుమానిస్తున్న ఓ మహిళ సోషల్‌ మీడియా ద్వారా పన్నిన హనీట్రాప్‌లో ఆయన చిక్కుకుని సున్నితమైన రక్షణ సమాచారాన్ని పంచుకున్నట్లు అధికారులు ఆరోపిస్తున్నారు. పశ్చిమ బెంగాల్‌కు చెందిన ప్రదీప్‌ 2014లో నేవీలో చేరగా, ప్రస్తుతం విశాఖపట్నం కేంద్రంగా ఉన్న తూర్పు నావికాదళ కమాండ్‌లో విధులు నిర్వహిస్తున్నాడు.

కోయంబత్తూరులోని ఐఎన్‌ఎస్‌ అగ్రణిలో నిర్వహిస్తున్న నిర్వహణ అభివృద్ధి శిక్షణకు హాజరవుతున్న సమయంలో ప్రదీప్‌ను అదుపులోకి తీసుకున్నారు. అధికారులు తెలిపిన వివరాల ప్రకారం.. కొన్ని నెలల క్రితం సోషల్‌ మీడియా ద్వారా పరిచయమైన మహిళ ఆయన నుంచి విశాఖపట్నం నావికాదళ స్థావరానికి సంబంధించిన వ్యూహాత్మక ఆస్తులు, యుద్ధ నౌకల కదలికలు, కార్యకలాపాలకు సంబంధించిన సున్నితమైన సమాచారాన్ని పొందినట్లు ఆరోపణలు ఉన్నాయి. అనుమానాస్పద డిజిటల్‌ కార్యకలాపాలను గుర్తించిన కౌంటర్‌ ఇంటెలిజెన్స్‌ అధికారులు నిఘా పెట్టి ఆయనను అరెస్ట్‌ చేశారు. ఈ కేసులో లీకైన సమాచారంపై దర్యాప్తు కొనసాగుతోంది.