కోయంబత్తూరులో నేవీ అధికారి అరెస్ట్..

కోయంబత్తూరులో భారత నేవీకి చెందిన అధికారి ప్రదీప్ ముఖర్జీని ఆంధ్రప్రదేశ్ పోలీసుల కౌంటర్ ఇంటెలిజెన్స్ విభాగం అరెస్ట్ చేసింది. రెడ్‌ఫీల్డ్స్‌లోని ఐఎన్‌ఎస్ అగ్రాణిలో మేనేజ్‌మెంట్ డెవలప్‌మెంట్ కోర్సుకు హాజరవుతున్న సమయంలో అక్టోబర్ 3న ఆయనను అదుపులోకి తీసుకున్నారు. పశ్చిమ బెంగాల్‌కు చెందిన 31 ఏళ్ల ప్రదీప్ ముఖర్జీ.. విశాఖపట్నంలోని ఈస్టర్న్ నేవల్ కమాండ్‌లో విధులు నిర్వహిస్తున్నట్లు అధికారులు తెలిపారు.

పాకిస్థాన్‌కు చెందిన మహిళా ఇంటెలిజెన్స్ ఆపరేటివ్‌తో సోషల్ మీడియా ద్వారా పరిచయం ఏర్పడి, హనీట్రాప్‌కు గురైనట్లు దర్యాప్తు అధికారులు అనుమానిస్తున్నారు. ఆమె ద్వారా విశాఖపట్నం నేవల్ బేస్‌కు సంబంధించిన వ్యూహాత్మక నేవల్ ఆస్తులు, నౌకాదళ కదలికలు, కార్యకలాపాలకు సంబంధించిన సున్నిత సమాచారాన్ని ప్రదీప్ షేర్ చేసినట్లు ఆరోపణలు ఉన్నాయి. అనుమానాస్పద డిజిటల్ కార్యకలాపాలను గుర్తించిన కౌంటర్ ఇంటెలిజెన్స్ విభాగం కొంతకాలంగా నిఘా పెట్టి ఆయనను అరెస్ట్ చేసినట్లు సమాచారం. కేసులో మరింత సమాచారం, ఇతరుల ప్రమేయంపై దర్యాప్తు కొనసాగుతోంది.