ఐఐటీ మద్రాస్‌లో కొత్త స్కిల్ కోర్సులు..

సాంకేతిక రంగంలో వేగంగా మార్పులు చోటుచేసుకుంటున్న నేపథ్యంలో పరిశ్రమల అవసరాలకు అనుగుణంగా కొత్త నైపుణ్యాలను అభివృద్ధి చేసుకోవడం ఉద్యోగులు, విద్యార్థులకు కీలకంగా మారింది. ఈ అవసరాలను దృష్టిలో ఉంచుకుని ప్రతిష్ఠాత్మక ఐఐటీ మద్రాస్ పలు అత్యాధునిక, డిమాండ్ ఉన్న రంగాల్లో ఆన్‌లైన్ ఎగ్జిక్యూటివ్ ఎడ్యుకేషన్, సర్టిఫికేషన్ ప్రోగ్రామ్‌లను అందిస్తోంది. ఎలక్ట్రిక్ వాహనాలు, మాన్యుఫాక్చరింగ్, సప్లై చైన్ మేనేజ్‌మెంట్, ఆర్టిఫిషియల్ ఇంటెలిజెన్స్, కన్‌స్ట్రక్షన్ టెక్నాలజీ, ఎన్విరాన్‌మెంటల్, సోషల్ అండ్ గవర్నెన్స్ వంటి రంగాలను ఈ కోర్సులు కవర్ చేస్తున్నాయి. రికార్డు చేసిన లెక్చర్లతో పాటు లైవ్ ఇంటరాక్టివ్ సెషన్లు కూడా ఉంటాయి. కోర్సును బట్టి వ్యవధి రెండు వారాల నుంచి ఆరు నెలల వరకు ఉంటుంది.

ప్రధాన కోర్సుల్లో సర్టిఫికెట్ ప్రోగ్రామ్ ఆన్ ఎలక్ట్రిక్ వెహికల్స్ (CPEV) నాలుగు నెలల వ్యవధితో ఉంటుంది. అక్టోబర్ 8 దరఖాస్తులకు చివరి తేదీ కాగా, అక్టోబర్ 9 నుంచి తరగతులు ప్రారంభమవుతాయి. ల్యాబ్‌తో కలిపి ఫీజు రూ.62,000 + 18% GST, ల్యాబ్ లేకుండా రూ.50,000 + 18% GST. ఇంజినీరింగ్, బీఎస్సీ తదితర అర్హతలు ఉన్నవారు దరఖాస్తు చేసుకోవచ్చు. మాస్టర్ క్లాస్ ఆన్ ESG నవంబర్ 13 నుంచి ప్రారంభమై, ఫీజు రూ.10,000 + GSTగా ఉంది. సప్లై చైన్ మేనేజ్‌మెంట్ ప్రొఫెషనల్ సర్టిఫికేషన్ (SCMPro) నవంబర్ 2 నుంచి ప్రారంభమై, అక్టోబర్ 31 వరకు దరఖాస్తు చేసుకోవచ్చు. దీని ఫీజు రూ.25,000 + GST. సప్లై చైన్ మేనేజ్‌మెంట్ డేటా + AI నవంబర్ 1 నుంచి ప్రారంభమై, ఫీజు రూ.65,000 + GSTగా ఉంది. ఈ కోర్సుకు కోడింగ్ అనుభవం అవసరం లేదు. EV Testing and Validation, Additive Manufacturing Technologies, Construction Technology and Management వంటి ఇతర కోర్సుల పూర్తి వివరాలను ఐఐటీ మద్రాస్ అధికారిక వెబ్‌సైట్‌లో తెలుసుకోవచ్చు.