తెలంగాణలో భారీ నుంచి అతి భారీ వర్షాలు...వాతావరణ శాఖ హెచ్చరిక!

వాయుగుండం ప్రభావంతో తెలంగాణలో భారీ నుంచి అతి భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం హెచ్చరించింది. పలు జిల్లాలకు భారీ వర్ష సూచన జారీ చేయడంతో పాటు కొన్ని ప్రాంతాల్లో అతి భారీ వర్షాలు కురిసే అవకాశం ఉందని తెలిపింది. పెద్దపల్లి, జయశంకర్ భూపాలపల్లి, ములుగు జిల్లాల్లో భారీ వర్షాలు కురిసే అవకాశం ఉందని పేర్కొంది. ఖమ్మం, భద్రాద్రి కొత్తగూడెం, సూర్యాపేట, మహబూబాబాద్, జయశంకర్ భూపాలపల్లి జిల్లాలకు ఆరెంజ్ అలర్ట్ ప్రకటించినట్లు తెలిపింది. ఉమ్మడి ఆదిలాబాద్, నిజామాబాద్, కరీంనగర్, వరంగల్, మెదక్, నల్గొండ జిల్లాలకు ఎల్లో అలర్ట్ జారీ చేసినట్లు పేర్కొంది.

హైదరాబాద్ మహానగర పరిధిలోనూ పలు ప్రాంతాల్లో ఓ మోస్తరు నుంచి భారీ వర్షాలు కురిసే అవకాశం ఉందని వాతావరణ శాఖ తెలిపింది. గంటకు 30 నుంచి 40 కిలోమీటర్ల వేగంతో ఈదురుగాలులు వీచే అవకాశం ఉన్నందున ప్రజలు అప్రమత్తంగా ఉండాలని సూచించింది. విద్యుత్ స్తంభాలు, చెట్ల కింద నిలబడవద్దని, అత్యవసరమైతే తప్ప బయటకు రావద్దని హెచ్చరించింది. భారీ వర్షాల నేపథ్యంలో జీహెచ్ఎంసీ అధికారులు ముందస్తు చర్యలు చేపట్టారు. ఐఎండీ తాజా హెచ్చరికలు, జిల్లాల వారీ సూచనలను ప్రజలు ఎప్పటికప్పుడు పరిశీలించాలని అధికారులు సూచిస్తున్నారు.