పరాగ్వేలో బ్యాంకింగ్ సంక్షోభం.. అధ్యక్షుడి రాజీనామాతో రాజకీయ ప్రకంపనలు!

దక్షిణ అమెరికా దేశమైన పరాగ్వేలో ఉయెనో బ్యాంక్ సంక్షోభం తీవ్ర రాజకీయ ప్రకంపనలు సృష్టిస్తోంది. దేశంలోని ప్రముఖ డిజిటల్ బ్యాంకుల్లో ఒకటైన ఉయెనో బ్యాంకును ఆర్థిక స్థిరత్వ నిబంధనలను ఉల్లంఘించిన నేపథ్యంలో కేంద్ర బ్యాంకు తన ఆధీనంలోకి తీసుకుంది. ఈ పరిణామంతో దాదాపు 30 లక్షల మంది ఖాతాదారులు తమ ఖాతాల్లోని నగదును వినియోగించుకోలేని పరిస్థితి ఏర్పడింది. బ్యాంకు మొబైల్ యాప్, శాఖల్లో సేవలు నిలిచిపోవడంతో ఖాతాదారులు ఆందోళనకు దిగారు. బ్యాంకు సుమారు 850 మిలియన్ డాలర్ల ప్రభుత్వ నిధులను నిర్వహిస్తున్నట్లు సమాచారం. ఖాతాదారులకు వారి డిపాజిట్ సొమ్మును తిరిగి చెల్లించే ప్రక్రియపై అధికారులు చర్యలు చేపట్టారు.

ఈ సంక్షోభం అధ్యక్షుడు శాంటియాగో పెనాకు రాజకీయంగా తీవ్ర ఇబ్బందులు తెచ్చిపెట్టింది. గతంలో ఉయెనో బ్యాంకు మాతృ సంస్థ గ్రూపో వాస్క్వెజ్‌లో పెనాకు వాటా ఉండటంతో ఆయనపై ప్రయోజనాల సంఘర్షణ ఆరోపణలు వచ్చాయి. బ్యాంకు వ్యవహారంపై దర్యాప్తు కొనసాగుతుండగా, నిరసనలు ఉద్ధృతమయ్యాయి. ఈ నేపథ్యంలో దేశంలో స్థిరత్వం, సామాజిక శాంతి, ప్రజాస్వామ్య సంస్థల పరిరక్షణను దృష్టిలో ఉంచుకుని తన అధ్యక్ష పదవికి రాజీనామా చేస్తున్నట్లు నవంబర్ 5న పెనా ప్రకటించారు. ఆయన రాజీనామాపై పార్లమెంటు నిర్ణయం తీసుకోవాల్సి ఉండగా, దిగువ సభ అభిశంసన తీర్మానానికి అనుకూలంగా ఓటు వేసింది.