హార్దిక్‌ పాండ్యా పంజాబ్‌ కింగ్స్‌లోకి వెళ్లడం నిజమేనా?

ఐపీఎల్‌ 2027 సీజన్‌కు ముందు ముంబై ఇండియన్స్‌ ఆల్‌రౌండర్‌ హార్దిక్‌ పాండ్యా పంజాబ్‌ కింగ్స్‌ జట్టులోకి మారబోతున్నాడంటూ సోషల్‌ మీడియాలో ఓ పోస్ట్‌ వైరల్‌గా మారింది. ‘PunjabKingsIpI’ అనే ఎక్స్‌ ఖాతాలో పండుగ శుభాకాంక్షలతో పాటు ‘దేఖో.. కోన్ ఆనే వాలా హై. పంజాబ్‌ ది షాన్‌, నవా తూఫాన్‌!’ అంటూ హార్దిక్‌ పేరును ప్రస్తావిస్తూ పోస్టు చేశారు. దీంతో అతడు పంజాబ్‌ కింగ్స్‌లో చేరడం దాదాపు ఖాయమైందని అభిమానులు భావించారు. అయితే, ఈ ఖాతా పంజాబ్‌ కింగ్స్‌ అధికారిక ఎక్స్‌ హ్యాండిల్‌ కాదు. ఫ్రాంచైజీ అధికారిక ఖాతా @PunjabKingsIPL కాగా, వైరల్‌ పోస్ట్‌ కొద్దిపాటి అక్షరాల మార్పుతో ఉన్న నకిలీ ఖాతా నుంచి వచ్చింది.

మరోవైపు, హార్దిక్‌ పాండ్యా, అర్ష్‌దీప్‌ సింగ్‌లతో కూడిన ప్లేయర్‌ స్వాప్‌ డీల్‌పై ముంబై ఇండియన్స్‌, పంజాబ్‌ కింగ్స్‌ మధ్య చర్చలు జరుగుతున్నట్లు క్రీడా నివేదికలు పేర్కొంటున్నాయి. అయితే, 2026 నవంబర్‌ 6 నాటికి ఈ ట్రేడ్‌పై ఇరు ఫ్రాంచైజీల నుంచి ఎలాంటి అధికారిక ప్రకటన వెలువడలేదు. ఆటగాళ్ల విడుదల, రిటెన్షన్‌ ప్రక్రియ నవంబర్‌ 17 వరకు కొనసాగనుంది. కాబట్టి హార్దిక్‌ పాండ్యా పంజాబ్‌ కింగ్స్‌లో చేరిపోయాడనే ప్రచారానికి ఇప్పటివరకు అధికారిక నిర్ధారణ లేదు. వైరల్‌ అవుతున్న పోస్టును అధికారిక ప్రకటనగా భావించకూడదు.