మురసు తుఫాన్ ఎఫెక్ట్.. తిరుమల భక్తుల కోసం టీటీడీ ప్రత్యేక ఏర్పాట్లు

అతి తీవ్ర తుఫాన్ మురసు ప్రభావంతో ఆంధ్రప్రదేశ్ తీర ప్రాంతాల్లో భారీ వర్షాలు, బలమైన ఈదురుగాలులు వీస్తున్న నేపథ్యంలో తిరుమల తిరుపతి దేవస్థానం (టీటీడీ) అప్రమత్తమైంది. ప్రకాశం జిల్లా ఒంగోలు సమీపంలో తుఫాన్ తీరం దాటడం ప్రారంభించిందని భారత వాతావరణ శాఖ, ఏపీ విపత్తుల నిర్వహణ సంస్థ వెల్లడించాయి. తీరం వెంట గంటకు 110 నుంచి 120 కిలోమీటర్ల వేగంతో గాలులు వీస్తుండగా, దక్షిణ కోస్తాంధ్రతో పాటు రాయలసీమలోనూ ఉరుములు, మెరుపులతో కూడిన భారీ నుంచి అతిభారీ వర్షాలు కురుస్తున్నాయి. ఈ నేపథ్యంలో తిరుమలకు వచ్చే భక్తులకు ఎలాంటి అసౌకర్యం కలగకుండా టీటీడీ ముందస్తు చర్యలు చేపట్టింది. తిరుమల పద్మావతి అతిథి గృహంలో వివిధ విభాగాల అధికారులతో అదనపు ఈవో సీహెచ్ వెంకయ్య చౌదరి సమీక్ష నిర్వహించారు. క్యూ లైన్లు బయటకు రాకుండా చూడాలని, భక్తులకు త్వరితగతిన దర్శనం కల్పించాలని ఆదేశించారు. వర్షాల కారణంగా అన్నప్రసాదాల పంపిణీకి అంతరాయం కలగకుండా అవసరమైన ప్రాంతాల్లో టార్పాలిన్లు ఏర్పాటు చేయాలని సూచించారు.

విద్యుత్ సరఫరాలో అంతరాయం కలగకుండా అప్రమత్తంగా ఉండాలని, సమస్యలు తలెత్తితే వెంటనే పరిష్కరించాలని విద్యుత్, ఇంజినీరింగ్ అధికారులను వెంకయ్య చౌదరి ఆదేశించారు. ఘాట్ రోడ్లలో కొండచరియలు, బండరాళ్లు పడే ప్రమాదం ఉన్న ప్రాంతాలను ముందుగానే గుర్తించి, అప్ ఘాట్, డౌన్ ఘాట్ మార్గాల్లో భద్రతా చర్యలు పటిష్టం చేయాలని సూచించారు. వైద్య సిబ్బంది అందుబాటులో ఉండి అవసరమైన భక్తులకు తక్షణ వైద్య సహాయం అందించాలని ఆదేశించారు. అన్ని విభాగాల అధికారులు సమన్వయంతో పనిచేసి భక్తులు ఎలాంటి ఇబ్బందులు లేకుండా శ్రీవారి దర్శనం చేసుకుని సురక్షితంగా స్వస్థలాలకు చేరుకునేలా చూడాలని స్పష్టం చేశారు. ఈ సమావేశంలో టీటీడీ చీఫ్ ఇంజినీర్ మనోహరం, ఎస్ఈ వేణుగోపాల్, చీఫ్ మెడికల్ ఆఫీసర్ డాక్టర్ కుసుమకుమారి, అన్నప్రసాదం డిప్యూటీ ఈవో రాజేంద్ర పాల్గొన్నారు.