సినీ నటుడు నాని ట్వీట్‌కు సినిమాటోగ్రఫీ శాఖ మంత్రి కోమటిరెడ్డి వెంకట్‌రెడ్డి స్పందన

హైదరాబాద్‌: తన తాజా చిత్రం ‘ది ప్యారడైజ్‌’ ప్రీమియర్‌ షోను ఆర్టీసీ క్రాస్‌రోడ్స్‌లో అభిమానులతో కలిసి వీక్షించేందుకు అనుమతి ఇవ్వాలని నటుడు నాని తెలంగాణ ప్రభుత్వాన్ని కోరారు. సెప్టెంబర్‌ 23న ప్రేక్షకులతో కలిసి సినిమా చూడాలన్న తన కోరికను సీఎం రేవంత్‌రెడ్డి, సినిమాటోగ్రఫీ మంత్రి కోమటిరెడ్డి వెంకట్‌రెడ్డి, పోలీసు అధికారులను ట్యాగ్‌ చేస్తూ నాని వెల్లడించారు. సినిమా ప్రేక్షకులతో కలిసి చూడటం తనకు ప్రత్యేక అనుభూతి అని, అవసరమైన భద్రతా నిబంధనలు పాటిస్తామని నాని తెలిపారు.

నాని విజ్ఞప్తిపై మంత్రి కోమటిరెడ్డి వెంకట్‌రెడ్డి స్పందిస్తూ.. తెలుగు చిత్ర పరిశ్రమకు, కళాకారులకు తెలంగాణ ప్రభుత్వం సహకరిస్తుందని పేర్కొన్నారు. అయితే శాంతిభద్రతలు, ప్రజల భద్రత, ట్రాఫిక్‌ క్రమబద్ధీకరణకు ప్రాధాన్యం ఉంటుందని తెలిపారు. ముఖ్యమంత్రి సూచనల మేరకు చిత్ర బృందం స్థానిక పోలీస్‌ స్టేషన్‌లో అధికారికంగా దరఖాస్తు చేసుకోవాలని సూచించారు. ప్రజలకు, అభిమానులకు ఇబ్బంది కలగకుండా పోలీసు శాఖ సమీక్షించి నిర్ణయం తీసుకుంటుందని మంత్రి తెలిపారు.