హిల్ట్‌ పాలసీపై అవగాహనకు ఆరు పారిశ్రామిక పార్కుల్లో రోడ్‌షోలు-భట్టి విక్రమార్క

హిల్ట్‌ పాలసీపై అవగాహన కల్పించేందుకు రాష్ట్రంలోని ఆరు పారిశ్రామిక పార్కుల్లో రోడ్‌షోలు నిర్వహించాలని ఉపముఖ్యమంత్రి మల్లు భట్టి విక్రమార్క అధికారులను ఆదేశించారు. మంత్రుల నేతృత్వంలో ఈ రోడ్‌షోలు నిర్వహించాలని సీఎస్‌కు సూచించారు. హిల్ట్‌ పాలసీ పరిధిలో అభ్యంతరాలు లేని పారిశ్రామిక పార్కుల్లో వచ్చిన దరఖాస్తులను పరిశీలించి, అర్హత ఉన్న వాటిని త్వరగా క్లియర్‌ చేయాలని ఆదేశించారు. రాష్ట్ర ఆదాయ వనరుల సమీకరణపై భట్టి విక్రమార్క, మంత్రి ఉత్తమ్‌కుమార్‌ రెడ్డి నేతృత్వంలోని కేబినెట్‌ సబ్‌ కమిటీ సమావేశంలో ఈ అంశాలపై సమీక్ష జరిగింది.

రాష్ట్రంలో అందుబాటులో ఉన్న వనరులను సమర్థంగా వినియోగించుకుంటూ ప్రభుత్వ ఆదాయాన్ని పెంచేందుకు సమగ్ర కార్యాచరణ రూపొందించాలని భట్టి విక్రమార్క సూచించారు. పర్యాటక రంగంలో పెద్ద ఎత్తున పెట్టుబడులను ఆకర్షించేలా ప్రాజెక్టులను సిద్ధం చేయాలని అధికారులను ఆదేశించారు. డిసెంబర్‌ 7 నుంచి 9 వరకు జరగనున్న తెలంగాణ రైజింగ్‌ గ్లోబల్‌ సమ్మిట్‌ కోసం దేశీయ, విదేశీ పెట్టుబడిదారులకు రాష్ట్ర పర్యాటక అవకాశాలను ప్రదర్శించేలా సుమారు 80 ప్రాజెక్టులను సిద్ధం చేయాలని సూచించారు. చారిత్రక ప్రదేశాలను పీపీపీ విధానంలో అభివృద్ధి చేయడం, టైగర్‌ టూరిజాన్ని ప్రారంభించడం, మూడు జిల్లాల్లో కారవాన్‌ పార్కుల ఏర్పాటును వేగవంతం చేయడం వంటి అంశాలపైనా సమావేశంలో చర్చించారు.