

కార్తిక మాసంలోని శుక్ల పక్ష నవమి తిథిని అక్షయ నవమిగా జరుపుకుంటారు. ఈ ఏడాది నవంబర్ 18, బుధవారం అక్షయ నవమి పర్వదినం వచ్చింది. సనాతన హిందూ సంప్రదాయంలో ఈ రోజుకు విశేష ప్రాధాన్యం ఉంది. అక్షయ నవమి సందర్భంగా జగద్ధాత్రి, శ్రీమహావిష్ణువు, లక్ష్మీనారాయణులతో పాటు ఉసిరి చెట్టును పూజించడం ఆనవాయితీగా వస్తోంది. పురాణాల ప్రకారం, ఈ రోజును సత్యయుగాది అని కూడా పిలుస్తారు. స్కంద పురాణంలో శ్రీమహావిష్ణువు లోకకల్యాణం కోసం కూష్మాండుడు అనే రాక్షసుడిని సంహరించినట్లు ప్రస్తావన ఉంది. కృతయుగం ప్రారంభమైన రోజుగా కూడా దీనిని భావిస్తారు. ఈ నేపథ్యంలో అక్షయ నవమి రోజున లక్ష్మీనారాయణులను పూజించి, రావి, ఉసిరి, తులసి మొక్కలకు ప్రత్యేక పూజలు నిర్వహిస్తారు. ఆవు నెయ్యితో దీపారాధన చేసి, పసుపు, కుంకుమ, అక్షింతలతో వృక్షాలను పూజించడం సంప్రదాయం. అనంతరం విష్ణు సహస్రనామ పారాయణం చేయడం శుభప్రదంగా భావిస్తారు.
అక్షయ నవమి సందర్భంగా విష్ణు విజయ స్తోత్రం, కనకధారా స్తోత్రం, దుర్గా స్తోత్రం, శ్రీలక్ష్మీ అష్టోత్తరం పఠించడం విశేష ఫలప్రదమని భక్తుల విశ్వాసం. పూజ అనంతరం చక్కెర పొంగలి, దద్ధోజనం, జామపండ్లు, కొబ్బరికాయలను నైవేద్యంగా సమర్పిస్తారు. ఈ రోజున ఉసిరి, రావి, తులసి మొక్కలకు తొమ్మిది ప్రదక్షిణలు చేయడం, 'ఓం ధాత్ర్యై నమః' మంత్రాన్ని జపించడం సంప్రదాయంగా పేర్కొంటారు. సంతానం కోరుకునే దంపతులు ఉపవాసంతో జగద్ధాత్రి పూజ చేస్తే సంతాన భాగ్యం కలుగుతుందని పురాణ విశ్వాసం. ఉసిరి పండ్లు, ఉన్ని వస్త్రాలు, అన్నదానం, దీపదానం చేయడం శ్రేయస్కరంగా భావిస్తారు. అక్షయం అంటే నశించనిది లేదా అనంతమైనది అని అర్థం. ఈ రోజున చేసే పూజలు, దానధర్మాలు అక్షయమైన పుణ్యఫలాలను అందిస్తాయని భక్తులు విశ్వసిస్తారు. అలాగే ఇంటి ఆవరణలో లేదా ఆలయ ప్రాంగణంలో ఉసిరి, తులసి మొక్కలను నాటడం ద్వారా ప్రకృతి పరిరక్షణకు తోడ్పడాలని ఈ పర్వదినం సందేశమిస్తోంది.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!