2028కు ముందే అమెరికా రాజకీయాల్లో వేడి...

2028 అమెరికా అధ్యక్ష ఎన్నికలకు ఇంకా సమయం ఉన్నప్పటికీ.. రిపబ్లికన్ పార్టీలో, ముఖ్యంగా డొనాల్డ్ ట్రంప్ ‘MAGA’ ఉద్యమంలో వారసత్వ పోరు ఇప్పటి నుంచే వేడెక్కుతోంది. ఉపాధ్యక్షుడు జేడీ వాన్స్, విదేశాంగ మంత్రి మార్కో రూబియో ట్రంప్ తర్వాతి నాయకత్వానికి ప్రధాన పోటీదారులుగా కనిపిస్తున్నారు. విదేశాంగ విధానం, ఇరాన్ యుద్ధం, అమెరికా సైనిక జోక్యం వంటి అంశాల్లో ఇద్దరి మధ్య భిన్నమైన వైఖరులు ఉండటంతో ఈ పోరు మరింత ఆసక్తికరంగా మారింది. ట్రంప్ ఇద్దరినీ ప్రశంసించినప్పటికీ.. తుది మద్దతు ఎవరికి ఇస్తారన్నది ఇంకా స్పష్టంగా లేదు.

మరోవైపు మాజీ ఫాక్స్ న్యూస్ హోస్ట్ టక్కర్ కార్ల్సన్ కూడా MAGAలో ప్రత్యామ్నాయ శక్తిగా ఎదుగుతున్నట్లు రాజకీయ వర్గాల్లో చర్చ జరుగుతోంది. ఇరాన్ యుద్ధంపై ట్రంప్ విధానాన్ని విమర్శించిన కార్ల్సన్.. 2028లో పోటీ చేసే అవకాశాలపై ఊహాగానాలకు కారణమయ్యారు. మరోవైపు నిక్ ఫ్యూంటెస్ ప్రభావం ఆన్‌లైన్ రైట్‌లో చర్చనీయాంశంగా మారింది. ఈ విభేదాలకు ఓటర్లలోని తరాల అంతరం కూడా తోడవుతోంది. 50 ఏళ్లు పైబడిన రిపబ్లికన్లలో 63% మంది ప్రపంచ వ్యవహారాల్లో అమెరికా చురుకైన పాత్ర పోషించాలని భావిస్తుండగా, 50 ఏళ్లలోపు రిపబ్లికన్లలో ఈ అభిప్రాయం 38%కే పరిమితమైంది. దీంతో MAGA భవిష్యత్ దిశ 2028 రిపబ్లికన్ పోరులో కీలక అంశంగా మారే అవకాశం ఉంది.