ఎన్‌ఎస్ఈ ఐపీఓకు ఊహించని డిమాండ్

నేషనల్‌ స్టాక్‌ ఎక్స్ఛేంజీ (ఎన్‌ఎస్ఈ) రూ.22,569 కోట్ల ఐపీఓకు ఇన్వెస్టర్ల నుంచి భారీ స్పందన లభించింది. సోమవారంతో ముగిసిన ఈ ఇష్యూకు 5.71 రెట్ల సబ్‌స్క్రిప్షన్‌ నమోదైంది. బీఎస్‌ఈ వెబ్‌సైట్‌ డేటా ప్రకారం.. ఎన్‌ఎస్ఈ ఆఫర్‌ చేసిన 8.86 కోట్లకు పైగా షేర్లకు గాను 50.58 కోట్లకు పైగా షేర్ల కొనుగోలుకు బిడ్లు దాఖలయ్యాయి. అర్హులైన సంస్థాగత కొనుగోలుదారుల విభాగంలో 12.68 రెట్లు, సంస్థాగతేతర ఇన్వెస్టర్ల విభాగంలో 6.55 రెట్లు, రిటైల్‌ ఇన్వెస్టర్ల విభాగంలో 1.39 రెట్ల సబ్‌స్క్రిప్షన్‌ లభించింది.

రూ.22,569 కోట్ల ఇష్యూ పరిమాణంతో పోలిస్తే అన్ని ఇన్వెస్టర్ల విభాగాల నుంచి ఎన్‌ఎస్ఈ షేర్ల కొనుగోలుకు వచ్చిన మొత్తం డిమాండ్‌ దాదాపు రూ.90,300 కోట్లుగా ఉంది. రిటైల్‌ విభాగంలో నమోదైన సబ్‌స్క్రిప్షన్‌ ఆధారంగా చూస్తే బిడ్‌ దాఖలు చేసిన ప్రతి నలుగురు రిటైల్‌ ఇన్వెస్టర్లలో దాదాపు ముగ్గురికి ఎన్‌ఎస్ఈ షేర్లు లభించే అవకాశం ఉంది. అయితే తుది కేటాయింపు ప్రక్రియ అనంతరం మాత్రమే ఖచ్చితమైన వివరాలు వెల్లడవుతాయి.