డబ్బు రెట్టింపు కావాలా? నితిన్ కామత్ ఇచ్చిన సింపుల్ ఫార్ములా

షేర్ మార్కెట్‌లో అసాధారణ లాభాల కోసం పరుగులు తీయడం కంటే క్రమశిక్షణతో పెట్టుబడులు పెట్టడమే దీర్ఘకాలిక సంపద సృష్టికి అసలైన మార్గమని జెరోధా సహ వ్యవస్థాపకుడు నితిన్ కామత్ తెలిపారు. సామాజిక మాధ్యమం ఎక్స్‌లో తన అభిప్రాయాలను పంచుకున్న ఆయన, సంక్లిష్ట వ్యూహాల కంటే సరళమైన పెట్టుబడి విధానాలను నిరంతరం పాటించడం ద్వారా ఆర్థిక లక్ష్యాలను సులభంగా చేరుకోవచ్చని పేర్కొన్నారు.

ఆర్థిక లక్ష్యాలు, పెట్టుబడి కాలపరిమితిని బట్టి ఈక్విటీ, రుణ పత్రాలు, బంగారం వంటి ఆస్తుల్లో సరైన నిష్పత్తిలో పెట్టుబడులు పెట్టాలని సూచించారు. విడివిడిగా షేర్లను ఎంపిక చేయడం కంటే తక్కువ వ్యయంతో ఉండే సూచీ నిధులు లేదా ఈటీఎఫ్‌లను ఎంచుకోవడం మంచిదన్నారు. మార్కెట్ హెచ్చుతగ్గులను పట్టించుకోకుండా క్రమం తప్పకుండా పెట్టుబడి పెట్టడం, ఆదాయం పెరిగే కొద్దీ పెట్టుబడి మొత్తాన్ని పెంచడం, నిర్ణీత వ్యవధిలో పోర్ట్‌ఫోలియోను సమతుల్యం చేసుకోవడం అవసరమని వివరించారు.

పెట్టుబడిదారులు ఈక్విటీ, రుణ పత్రాలు, బంగారం మధ్య నిధులను ఎలా విభజించాలనే సందిగ్ధతలో ఉంటారని నితిన్ కామత్ పేర్కొన్నారు. ఈ సమస్యకు పరిష్కారంగా భారతీయ మూలధన మార్కెట్ నియంత్రణ సంస్థ ప్రవేశపెట్టిన జీవిత చక్ర నిధులు ఉపయోగపడతాయని చెప్పారు. పెట్టుబడి ప్రారంభ దశలో ఈక్విటీల్లో అధికంగా పెట్టుబడి పెట్టి, లక్ష్యం దగ్గరపడే కొద్దీ క్రమంగా రుణ పత్రాల వైపు మళ్లించడం ద్వారా ఈ నిధులు పెట్టుబడిదారుల పోర్ట్‌ఫోలియోను స్వయంచాలకంగా సమతుల్యం చేస్తాయని వివరించారు.