రూపాయి దెబ్బకు చమురు కంపెనీల టెన్షన్

ఇంధన ధరలను లీటరుకు మూడు రూపాయలు పెంచినప్పటికీ ప్రభుత్వ రంగ చమురు సంస్థలకు పూర్తిస్థాయి ఊరట లభించలేదు. రూపాయి విలువ భారీగా పడిపోవడం వల్ల దిగుమతి వ్యయం పెరిగి, పెరిగిన ధరల ప్రయోజనం చాలా వరకు తగ్గిపోతోందని విశ్లేషకులు చెబుతున్నారు. పశ్చిమాసియా ఉద్రిక్తతలు పెరిగిన తర్వాత చమురు ధరలు భారీగా పెరగడంతో ఆయిల్‌ సంస్థలపై ఆర్థిక ఒత్తిడి పెరిగింది.

భారత్‌ తన ముడి చమురు అవసరాల్లో ఎక్కువ భాగాన్ని విదేశాల నుంచి దిగుమతి చేసుకుంటోంది. రూపాయి బలహీనపడడంతో అదే చమురు దిగుమతికి మరింత ఎక్కువ రూపాయలు చెల్లించాల్సి వస్తోంది. ఇంధన ధరల పెంపుతో కొంత ఆదాయం వచ్చినప్పటికీ, పెరిగిన దిగుమతి ఖర్చులు ఆ లాభాన్ని తగ్గిస్తున్నాయి. ముడి చమురు ధరలు బ్యారెల్‌కు వంద డాలర్లకు పైగా కొనసాగితే చమురు సంస్థల నష్టాలు మరింత పెరిగే అవకాశముందని నిపుణులు హెచ్చరిస్తున్నారు.

చమురు ధరలు తగ్గకపోతే భవిష్యత్తులో మరిన్ని ఇంధన ధరల పెంపులు అవసరమయ్యే అవకాశం ఉందని మార్కెట్‌ నిపుణులు అభిప్రాయపడుతున్నారు. రూపాయి మారకం విలువపై ఒత్తిడి కొనసాగితే చమురు సంస్థల లాభదాయకత దెబ్బతింటుందని చెబుతున్నారు. ఇప్పటికే కొన్ని ప్రభుత్వ రంగ చమురు సంస్థలు రాబోయే త్రైమాసికంలో నష్టాలు ఎదురయ్యే అవకాశముందని హెచ్చరించాయి.