ఆన్‌లైన్‌లో సరుకులు కొనే ముందు ఈ వివరాలు తప్పక తెలుసుకోండి

ప్రస్తుత డిజిటల్‌ యుగంలో కిరాణా సరుకులు, నిత్యావసర ఉత్పత్తులను ఆన్‌లైన్‌ యాప్‌లు, వెబ్‌సైట్ల ద్వారా ఆర్డర్‌ చేయడం సాధారణమైంది. అయితే, వస్తువులను కొనుగోలు చేసే ముందు వాటి ‘బెస్ట్‌ బిఫోర్‌’ లేదా గడువు ముగిసే తేదీలు స్పష్టంగా కనిపించడం లేదని వినియోగదారులు ఆందోళన వ్యక్తం చేస్తున్నారు. ఉత్పత్తి చేతికి వచ్చే వరకు దాని కాలపరిమితి తెలియకపోవడంతో, గడువు దగ్గరపడిన వస్తువులు డెలివరీ అవుతున్నాయనే ఫిర్యాదులు వస్తున్నాయి. ఈ సమస్యపై ‘లోకల్‌సర్కిల్స్‌’ సంస్థ దేశవ్యాప్తంగా దాదాపు 20,000 మంది ఆన్‌లైన్‌ వినియోగదారులతో నిర్వహించిన సర్వేలో, 39 శాతం మంది తాము ఉపయోగించే అత్యధిక నిత్యావసరాల యాప్‌లు లేదా వెబ్‌సైట్లలో గడువు తేదీలను గుర్తించలేకపోతున్నామని తెలిపారు. కేవలం 27 శాతం మందికి మాత్రమే అన్ని వేదికల్లో ఈ వివరాలు కనిపిస్తున్నాయని వెల్లడించారు. 33 శాతం మంది ఏ యాప్‌లోనూ ఈ తేదీలను చూడలేకపోయామని చెప్పారు.

కొన్ని ప్రముఖ బ్రాండ్లు, ఈ-కామర్స్‌ వేదికలు ఉత్పత్తులపై ‘తయారీ తేదీ నుంచి ఆరు నెలల వరకు ఉపయోగించవచ్చు’ అని మాత్రమే పేర్కొంటున్నాయి. అయితే, తయారీ తేదీని స్పష్టంగా చూపించకపోవడంతో ఉత్పత్తికి ఇంకా ఎంత కాలపరిమితి మిగిలి ఉందో వినియోగదారులు అంచనా వేయలేకపోతున్నారు. కేవలం షెల్ఫ్‌ లైఫ్‌ను పేర్కొని తయారీ తేదీని వెల్లడించకపోవడం వల్ల కొనుగోలుదారులు ఇబ్బందులు ఎదుర్కొనే అవకాశం ఉందని నివేదిక పేర్కొంది. లీగల్‌ మెట్రాలజీ (ప్యాకేజ్డ్‌ కమోడిటీస్‌) నిబంధనలు 2011కు 2017లో చేసిన సవరణల ప్రకారం, ఆన్‌లైన్‌ వేదికలు కొనుగోలుకు ముందే ఉత్పత్తులకు సంబంధించిన ముఖ్యమైన వివరాలను డిజిటల్‌గా ప్రదర్శించాలి. ఇందులో ‘బెస్ట్‌ బిఫోర్‌’ లేదా ‘యూజ్‌ బై’ తేదీలు కూడా ఉంటాయి. ఈ నిబంధనలు థర్డ్‌-పార్టీ ఈ-కామర్స్‌ మార్కెట్‌ప్లేస్‌లతో పాటు బ్రాండ్ల సొంత వెబ్‌సైట్లకూ వర్తిస్తాయి.

వినియోగదారుల హక్కుల పరిరక్షణకు గడువు తేదీల ప్రదర్శనపై సంబంధిత అధికారులు దృష్టి సారిస్తున్నట్లు కథనంలో పేర్కొన్నారు. భారత ఆహార భద్రత, ప్రమాణాల ప్రాధికార సంస్థ (ఎఫ్‌ఎస్‌ఎస్‌ఏఐ) నిబంధనల ప్రకారం, ఆన్‌లైన్‌ వేదికల ద్వారా డెలివరీ చేసే ఆహార ఉత్పత్తులకు కనీసం 30 శాతం షెల్ఫ్‌ లైఫ్‌ లేదా కనీసం 45 రోజుల గడువు మిగిలి ఉండాలి. ఉత్పత్తుల గడువు వివరాలను కొనుగోలుకు ముందే స్పష్టంగా చూపించడం ద్వారా వినియోగదారులు సమాచారంతో కూడిన నిర్ణయం తీసుకునే అవకాశం ఉంటుందని ఈ అంశం ప్రాధాన్యతను వెల్లడిస్తోంది.