డీజిల్‌లో 15% ఐసోబ్యూటనాల్ కలపాలన్న కేంద్రం ప్రణాళిక

చమురు దిగుమతుల భారాన్ని తగ్గించేందుకు కేంద్ర ప్రభుత్వం కొత్త ప్రత్యామ్నాయ ఇంధన వ్యూహంపై దృష్టి సారించింది. డీజిల్‌లో 15 శాతం ఐసోబ్యూటనాల్ కలపడం ద్వారా ఇంధన భద్రతను పెంచడం, రవాణా రంగంలో కార్బన్ ఉద్గారాలను తగ్గించడం లక్ష్యమని కేంద్రం తెలిపింది. ఈ విషయాన్ని కేంద్ర రోడ్డు, రవాణా శాఖ మంత్రి నితిన్ గడ్కరీ వెల్లడించారు.

ఇథనాల్‌ను నేరుగా డీజిల్‌లో కలపడం సాధ్యం కాకపోవడంతో, దానిని ఐసోబ్యూటనాల్‌గా మార్చే సాంకేతికతపై ప్రభుత్వం పనిచేస్తోంది. పైలట్ ప్రాజెక్ట్ ఇప్పటికే మంచి ఫలితాలు ఇచ్చిందని అధికారులు తెలిపారు. ఈ జీవ ఇంధనం తక్కువ కాలుష్యం ఉత్పత్తి చేయడంతో పాటు ఇంజిన్ పనితీరును మెరుగుపరుస్తుందని, రైతులకు అదనపు ఆదాయం కూడా అందించే అవకాశం ఉందని పేర్కొన్నారు.