బెంగళూరులో కొత్త గూగుల్ కార్యాలయం!

అంతర్జాతీయ టెక్ దిగ్గజం ఆల్ఫాబెట్ ఇంక్., గూగుల్ మాతృసంస్థ, భారత్‌లో మరింత విస్తరణకు సన్నాహాలు చేస్తోంది. అమెరికాలో విదేశీ ఉద్యోగులకు వర్క్ వీసా నిబంధనలు కఠినతరం కావడంతో అవసరమైన నిపుణులను నియమించుకునేందుకు భారత్‌లోనే మరో భారీ కార్యాలయాన్ని ఏర్పాటు చేయాలని కంపెనీ యోచిస్తున్నట్లు బ్లూమ్‌బర్గ్ న్యూస్ నివేదించింది. ముఖ్యంగా టెక్ హబ్‌గా పేరుగాంచిన బెంగళూరులో ఈ విస్తరణ చేపట్టనున్నట్లు సమాచారం.

వైట్‌ఫీల్డ్ టెక్ కారిడార్‌లోని అలెంబిక్ సిటీలో ఒక కార్యాలయ టవర్‌ను కంపెనీ లీజుకు తీసుకున్నట్లు తెలుస్తోంది. అదనంగా మరో రెండు స్థలాలను కొనుగోలు చేసినట్లు సమాచారం. ఈ మొత్తం స్థలం సుమారు 24 లక్షల చదరపు అడుగులుగా ఉండగా, ఇందులో సుమారు 20,000 మంది అదనపు ఉద్యోగులు పనిచేసే అవకాశం ఉంది. ప్రస్తుతం భారత్‌లో ఆల్ఫాబెట్ సంస్థకు 14,000 మంది ఉద్యోగులు ఉండగా, ప్రపంచవ్యాప్తంగా సుమారు 1,90,000 మంది సిబ్బంది పనిచేస్తున్నారు. ఇది భారత ఐటీ రంగంపై కంపెనీ విశ్వాసాన్ని సూచిస్తోంది.