పుస్తకాలతో ఆడుకున్న ఏఐ...చివరికి భారీ మూల్యం

కృత్రిమ మేధస్సు (ఏఐ) రంగంలో కాపీరైట్ వివాదాలకు సంబంధించి అతిపెద్ద పరిణామంగా యాంత్రోపిక్ (Anthropic) సంస్థ 1.5 బిలియన్ డాలర్లు (సుమారు రూ.14,400 కోట్లు) సెటిల్‌మెంట్‌కు అంగీకరించింది. అనుమతి లేకుండా కాపీరైట్ పుస్తకాలను ఏఐ శిక్షణ కోసం వినియోగించిందన్న ఆరోపణల నేపథ్యంలో ఈ ఒప్పందం కుదిరింది. బ్లూమ్స్‌బరీ ప్రచురించిన 14 వేలకుపైగా పుస్తకాలు, అందులో జేకే రౌలింగ్, సారా జే మాస్, సుసన్నా క్లార్క్ రచనలు కూడా ఈ పరిధిలో ఉన్నాయి.

ఈ సెటిల్‌మెంట్ ప్రకారం అర్హత కలిగిన ప్రతి పుస్తకానికి సగటున 3,000 డాలర్ల పరిహారం అందనుంది. న్యాయ ఖర్చులు మినహా మిగిలిన మొత్తాన్ని ప్రచురణ సంస్థలు, రచయితలు సమానంగా పంచుకోనున్నారు. ఈ తీర్పు ఏఐ రంగంలో కాపీరైట్ చట్టాలకు కీలక మైలురాయిగా నిలవడంతో పాటు, ఓపెన్‌ఏఐ, మెటా వంటి సంస్థలపై కొనసాగుతున్న కేసులపై కూడా ప్రభావం చూపే అవకాశం ఉందని నిపుణులు భావిస్తున్నారు.