ఏఐ కోడింగ్ ఖర్చులను తగ్గించేలా గిట్‌హబ్ కొత్త టూల్..

మైక్రోసాఫ్ట్‌కు చెందిన గిట్‌హబ్ సాఫ్ట్‌వేర్ డెవలపర్ల కోసం ‘కోపైలట్ ఫ్యూజన్’ పేరుతో సరికొత్త ఏఐ ఆధారిత వ్యవస్థను ఆవిష్కరించింది. సాఫ్ట్‌వేర్ అభివృద్ధి పనులకు ఏ ఏఐ మోడల్‌ను ఉపయోగించాలనే విషయాన్ని స్వయంచాలకంగా నిర్ణయించడంతో పాటు, వాటి పనితీరును సమన్వయం చేయడం దీని ప్రత్యేకత. శాన్‌ఫ్రాన్సిస్కోలో జరిగిన గిట్‌హబ్ యూనివర్స్ కార్యక్రమంలో ఈ టూల్‌ను పరిచయం చేశారు. ఆర్టిఫిషియల్ అనాలిసిస్ కోడింగ్ ఏజెంట్ ఇండెక్స్‌లో కోపైలట్ ఫ్యూజన్ మ్యాక్స్ 60 స్కోరు సాధించిందని గిట్‌హబ్ వెల్లడించింది. క్లాడ్ కోడ్ (ఓపస్ 5.5 మ్యాక్స్) సాధించిన 58 స్కోరు కంటే ఇది ఎక్కువని పేర్కొంది. అంతేకాకుండా దాదాపు సగం ఏపీఐ ఖర్చు, టోకెన్ల వినియోగంతో పనులను 40 శాతం వేగంగా పూర్తి చేయగలదని సంస్థ తెలిపింది.

డెవలపర్లు ఇందులో స్టాండర్డ్, హై, మ్యాక్స్ అనే మూడు స్థాయిల్లో తమకు కావాల్సిన పనితీరును ఎంచుకోవచ్చు. ఏఐ మోడళ్ల ఎంపిక, వాటి మధ్య సమన్వయం, క్యాస్కేడింగ్, క్రిటిక్ రివ్యూల వంటి ప్రక్రియలను కోపైలట్ ఫ్యూజన్ నిర్వహిస్తుంది. ఈ వ్యవస్థ ద్వారా అత్యాధునిక ఏఐ పనితీరును 40 శాతం వేగంగా, గరిష్ఠంగా 77 శాతం తక్కువ ఖర్చుతో అందించవచ్చని మైక్రోసాఫ్ట్ సీఈఓ సత్య నాదెళ్ల పేర్కొన్నారు. ప్రాజెక్టుల మధ్య ఏఐ ఏజెంట్లు, టూల్స్‌ను అనుసంధానించే గిట్‌హబ్ కోపైలట్ యాప్‌ను కూడా సంస్థ పరిచయం చేసింది. ఎంటర్‌ప్రైజ్ వినియోగదారులు ప్రత్యేక సబ్‌స్క్రిప్షన్ లేకుండానే కోపైలట్ ఫీచర్లను ఉపయోగించుకోవచ్చని, వినియోగించిన ఏఐ క్రెడిట్లకే చెల్లించాల్సి ఉంటుందని తెలిపింది. ప్రపంచవ్యాప్తంగా గిట్‌హబ్‌కు 22.5 కోట్లకు పైగా డెవలపర్లు ఉండగా, వారిలో భారత్‌లోనే 3.2 కోట్ల మంది ఉన్నారు.