గువాహటి వన్డేలో విండీస్‌ బ్యాటింగ్‌ జోరు..

గువాహటిలో భారత్‌తో జరుగుతున్న రెండో వన్డేలో వెస్టిండీస్‌ భారీ స్కోరు సాధించింది. టాస్‌ ఓడి తొలుత బ్యాటింగ్‌కు దిగిన ఆ జట్టు నిర్ణీత 50 ఓవర్లలో 7 వికెట్ల నష్టానికి 405 పరుగులు చేసింది. జాన్‌ క్యాంప్‌బెల్‌ (101), కెప్టెన్‌ షై హోప్‌ (104), అమీర్‌ జంగూ (114) సెంచరీలతో చెలరేగారు. హోప్‌, జంగూ కలిసి మూడో వికెట్‌కు 182 పరుగులు జోడించారు. భారత బౌలర్లలో కుల్‌దీప్‌ యాదవ్‌, రవీంద్ర జడేజా, గుర్నూర్‌ బ్రార్‌ రెండేసి వికెట్లు తీయగా.. ప్రసిధ్‌ కృష్ణకు ఒక వికెట్‌ దక్కింది.

భారత్‌పై వన్డేల్లో వెస్టిండీస్‌కు ఇదే అత్యధిక స్కోరు. ఈ మ్యాచ్‌లో కుల్‌దీప్‌ యాదవ్‌ 123వ మ్యాచ్‌లో 200 వన్డే వికెట్ల మైలురాయిని చేరుకున్నాడు. భారత్‌ ఇప్పటివరకు వన్డేల్లో అత్యధికంగా 360 పరుగుల లక్ష్యాన్ని విజయవంతంగా ఛేదించింది. 2013లో ఆస్ట్రేలియాపై ఈ ఘనత సాధించింది. దీంతో 406 పరుగుల లక్ష్యాన్ని ఛేదిస్తే టీమ్‌ఇండియా కొత్త రికార్డు సృష్టించనుంది. భారత్‌ తరఫున ఆకిబ్‌ నబీ వన్డేల్లో అరంగేట్రం చేయగా.. వెస్టిండీస్‌ నాలుగు మార్పులతో బరిలోకి దిగింది.