టీజీఐపాస్‌ వెబ్‌సైట్‌ హ్యాకింగ్‌ కేసులో ముమ్మర దర్యాప్తు

తెలంగాణ ప్రభుత్వానికి చెందిన టీజీఐపాస్‌ (TG-iPASS) వెబ్‌సైట్‌ హ్యాకింగ్‌ కేసులో తెలంగాణ సైబర్‌ సెక్యూరిటీ బ్యూరో (TGCSB) దర్యాప్తును ముమ్మరం చేసింది. అక్టోబర్‌ 22న రాత్రి 11.36 గంటలకు ఈ వెబ్‌సైట్‌ హ్యాకింగ్‌కు గురైనట్లు గుర్తించారు. హ్యాకర్లు వెబ్‌సైట్‌ డేటాబేస్‌ను ఎన్‌క్రిప్ట్‌ చేయడంతో సేవలు నిలిచిపోయాయి. దీంతో వెబ్‌సైట్‌ అందుబాటులో లేకుండా పోయింది.

ఈ ఘటనపై దర్యాప్తు చేపట్టిన అధికారులు, టర్కీ నుంచి వెబ్‌సైట్‌పై సైబర్‌ దాడి జరిగినట్లు గుర్తించినట్లు సమాచారం. ఎన్‌క్రిప్ట్‌ అయిన డేటాను నిపుణుల బృందం విజయవంతంగా రికవరీ చేయడంతో వెబ్‌సైట్‌ సేవలను తిరిగి ప్రారంభించారు. ఈ హ్యాకింగ్‌ వెనుక ఉన్న వ్యక్తులు, దాడికి సంబంధించిన ఇతర వివరాలను గుర్తించేందుకు TGCSB అధికారులు దర్యాప్తు కొనసాగిస్తున్నారు.