పేటీఎం వాలెట్‌ సేవలకు ఆర్‌బీఐ సూత్రప్రాయ అనుమతి

పేటీఎం వాలెట్‌ సేవలను తిరిగి ప్రారంభించే దిశగా కీలక ముందడుగు పడింది. పేటీఎం మాతృసంస్థ వన్‌97 కమ్యూనికేషన్స్‌కు చెందిన అనుబంధ సంస్థ పేటీఎం పేమెంట్స్‌ సర్వీసెస్‌ (PPSL)కు రిజర్వ్‌ బ్యాంక్‌ ఆఫ్‌ ఇండియా (RBI) నుంచి సూత్రప్రాయ అనుమతి లభించింది. ప్రీపెయిడ్‌ పేమెంట్‌ సాధనాలను (PPI) జారీ చేసేందుకు నవంబర్‌ 13న ఆర్‌బీఐ ఆథరైజేషన్‌ ఇచ్చినట్లు వన్‌97 కమ్యూనికేషన్స్‌ వెల్లడించింది. అయితే, సైబర్‌ సెక్యూరిటీ సహా పలు అంశాలపై సిస్టమ్‌ ఆడిట్‌ నిర్వహించాలని ఆర్‌బీఐ సూచించినట్లు తెలిపింది.

సిస్టమ్‌ ఆడిట్‌ పూర్తయి, ఆర్‌బీఐ నుంచి తుది అనుమతి లభించిన తర్వాతే పీపీఎస్‌ఎల్‌ ప్రీపెయిడ్‌ పేమెంట్‌ సాధనాలను జారీ చేయగలదు. పేటీఎం 2014లో ప్రారంభించిన వాలెట్‌ వ్యాపారాన్ని 2017లో పేటీఎం పేమెంట్స్‌ బ్యాంక్‌ (PPBL)కు బదిలీ చేసింది. అయితే, నిబంధనల ఉల్లంఘన ఆరోపణల నేపథ్యంలో 2024 జనవరిలో కొత్త డిపాజిట్లు, క్రెడిట్లను స్వీకరించకుండా ఆర్‌బీఐ ఆంక్షలు విధించింది. అనంతరం 2026 ఏప్రిల్‌లో పేటీఎం పేమెంట్స్‌ బ్యాంక్‌ బ్యాంకింగ్‌ లైసెన్సును రద్దు చేసింది. ఈ పరిణామాల నేపథ్యంలో పీపీఎస్‌ఎల్‌కు తాజాగా లభించిన అనుమతి ప్రాధాన్యం సంతరించుకుంది.