పాలిటెక్నిక్‌లు విద్యాశాఖ పరిధిలోనే కొనసాగింపు.. ప్రభుత్వం కీలక నిర్ణయం

పాలిటెక్నిక్‌ కళాశాలలను కార్మిక శాఖ (శక్తి విభాగం) పరిధిలోకి తీసుకురావాలన్న ప్రతిపాదనను తెలంగాణ ప్రభుత్వం ఉపసంహరించుకుంది. ఈ మేరకు గతంలో జారీ చేసిన జీవో 97ను సవరిస్తూ జీవో 157ను విడుదల చేసింది. రాష్ట్రంలోని ప్రభుత్వ పాలిటెక్నిక్‌ కళాశాలలు ఇకపై విద్యాశాఖ పరిధిలోనే కొనసాగుతాయని స్పష్టం చేసింది. ఐటీఐలు, అడ్వాన్స్‌డ్‌ టెక్నాలజీ సెంటర్లు (ఏటీఐలు) మాత్రం కార్మిక శాఖ పరిధిలోనే ఉంటాయని పేర్కొంది. యంగ్‌ ఇండియా స్కిల్‌ యూనివర్సిటీ కూడా విద్యాశాఖ పరిధిలో కొనసాగుతుందని వెల్లడించింది.

తెలంగాణ ప్రభుత్వం గత జులై 3న జీవో 97ను జారీ చేస్తూ కార్మిక, ఉపాధి, శిక్షణ శాఖ పేరును శక్తిగా మారుస్తూ పలు మార్పులు చేసింది. ఇందులో భాగంగా పాలిటెక్నిక్‌ కళాశాలలు, ఐటీఐలు, అడ్వాన్స్‌డ్‌ టెక్నాలజీ సెంటర్లను శక్తి పరిధిలోకి తీసుకురావాలని నిర్ణయించింది. పాలిటెక్నిక్‌ విద్యను యంగ్‌ ఇండియా స్కిల్‌ యూనివర్సిటీతో అనుసంధానం చేయాలన్న ప్రతిపాదనను కూడా తెరపైకి తెచ్చింది. దీనిపై విద్యార్థులు నెల రోజుల పాటు ఆందోళనలు చేపట్టారు. దీంతో ప్రభుత్వం కె.కేశవరావు నేతృత్వంలో హైపవర్‌ కమిటీని ఏర్పాటు చేసింది. కమిటీ సిఫార్సుల మేరకు పాలిటెక్నిక్‌ కళాశాలలను విద్యాశాఖ పరిధిలోనే కొనసాగించాలని, స్కిల్‌ యూనివర్సిటీలో విలీనం చేయకూడదని తాజాగా నిర్ణయించింది.