చెన్నై ఓపెన్‌లో చరిత్ర సృష్టించిన వైష్ణవి అద్కర్, రుతుజ భోస్లే జోడీ..

చెన్నై ఓపెన్‌ టెన్నిస్‌ టోర్నీలో భారత క్రీడాకారిణులు వైష్ణవి అద్కర్, రుతుజ భోస్లే జోడీ చరిత్ర సృష్టించింది. డబ్ల్యూటీఏ టూర్‌ స్థాయిలో డబుల్స్‌ ఫైనల్‌కు చేరిన తొలి భారత జంటగా రికార్డు నెలకొల్పింది. శనివారం జరిగిన మహిళల డబుల్స్‌ సెమీఫైనల్లో రెండో సీడ్‌ వెరోనికా ఫాల్కోస్కా (పోలండ్‌), అలెనా స్మిత్‌ (అమెరికా) జోడీతో తలపడిన భారత ద్వయం 6-2, 2-6, 10-8తో విజయం సాధించింది. తొలి సెట్‌లో ప్రత్యర్థుల తప్పిదాలను సద్వినియోగం చేసుకున్న అద్కర్, రుతుజ 4-1తో ఆధిక్యంలోకి వెళ్లి సెట్‌ను 6-2తో సొంతం చేసుకున్నారు.

అయితే రెండో సెట్‌లో భారత జంట తడబడటంతో ఫాల్కోస్కా, స్మిత్‌ ద్వయం 6-2తో సెట్‌ను గెలుచుకుని స్కోరును సమం చేసింది. దీంతో మ్యాచ్‌ నిర్ణయాత్మక టైబ్రేక్‌కు చేరింది. అక్కడ ఒత్తిడిని అధిగమించిన అద్కర్, రుతుజ 10-8తో గెలిచి ఫైనల్‌లోకి దూసుకెళ్లారు. భారత టెన్నిస్‌ దిగ్గజం సానియా మీర్జా తన కెరీర్‌లో 43 డబుల్స్‌ టైటిళ్లు గెలిచినప్పటికీ, ఆ విజయాల్లో ఆమె భాగస్వాములందరూ విదేశీ క్రీడాకారులే. ఇప్పుడు వైష్ణవి, రుతుజ సాధించిన ఈ ఘనత భారత మహిళల డబుల్స్‌ టెన్నిస్‌లో కీలక మైలురాయిగా నిలిచింది.