దీపావళి వేళ ఏపీలో వరుస అగ్ని ప్రమాదాలు..సీఎం చంద్రబాబు ఆరా

దీపావళి వేడుకల నేపథ్యంలో ఆంధ్రప్రదేశ్‌లోని పలు ప్రాంతాల్లో చోటుచేసుకున్న అగ్ని ప్రమాదాలపై ముఖ్యమంత్రి చంద్రబాబు నాయుడు ఆరా తీశారు. రాజాం, గన్నవరం, తిరువూరుల్లో జరిగిన ప్రమాదాల వివరాలను అధికారులను అడిగి తెలుసుకున్నారు. ఆయా ఘటనలు ఎలా చోటుచేసుకున్నాయి? ప్రమాదాల అనంతరం అధికారులు తీసుకున్న చర్యలు ఏమిటి? అనే వివరాలను తెలుసుకున్నారు. పండుగ సమయంలో బాణసంచా వినియోగం, ఇతర అగ్ని సంబంధిత కార్యకలాపాల కారణంగా ప్రమాదాలు జరిగే అవకాశం ఉన్నందున అధికారులు మరింత అప్రమత్తంగా ఉండాలని సూచించారు.

ఇలాంటి ఘటనలు పునరావృతం కాకుండా అవసరమైన అన్ని జాగ్రత్తలు తీసుకోవాలని సీఎం అధికారులను ఆదేశించారు. అత్యవసర పరిస్థితుల్లో వెంటనే స్పందించేలా సంబంధిత శాఖల మధ్య సమన్వయం ఉండాలని స్పష్టం చేశారు. మరోవైపు రాష్ట్రంలోని వివిధ ప్రాంతాల్లో చోటుచేసుకున్న అగ్ని ప్రమాదాలపై హోంమంత్రి వంగలపూడి అనిత కూడా ఆరా తీశారు. ఘటనలకు సంబంధించిన వివరాలను అధికారులను అడిగి తెలుసుకున్నారు. దీపావళి వేళ ప్రజల భద్రతకు ప్రాధాన్యతనిస్తూ ముందస్తు జాగ్రత్తలు తీసుకోవాలని ప్రభుత్వం సూచించింది.