స్వదేశానికి షేక్ హసీనా రీ ఎంట్రీకి సన్నాహాలు

బంగ్లాదేశ్ మాజీ ప్రధాని షేక్ హసీనా భారత్‌లో ఉంటున్న నేపథ్యంలో, తిరిగి స్వదేశానికి వెళ్లేందుకు సన్నాహాలు చేస్తున్నట్లు సమాచారం. ఇందులో భాగంగా ఢిల్లీలోని బంగ్లాదేశ్ రాయబార కార్యాలయాన్ని సంప్రదించి కొత్త పాస్‌పోర్టు, గుర్తింపు కార్డు జారీ చేయాలని కోరినట్లు వార్తలు వస్తున్నాయి. డిసెంబరులో బంగ్లాదేశ్‌కు తిరిగి వెళ్లాలని ఆమె యోచిస్తున్నట్లు పలు నివేదికలు పేర్కొంటున్నాయి. ప్రస్తుతం బంగ్లాదేశ్‌లో ఆమె ఎదుర్కొంటున్న రాజకీయ, న్యాయపరమైన పరిణామాల నేపథ్యంలో ఈ వార్తలు ప్రాధాన్యం సంతరించుకున్నాయి.

స్వదేశానికి తిరిగి వెళ్లిన అనంతరం కోర్టు ఎదుట లొంగిపోవాలని షేక్ హసీనా భావిస్తున్నట్లు కూడా కథనాలు వెల్లడిస్తున్నాయి. అయితే, ఆమె తిరుగు ప్రయాణ ప్రణాళికపై గానీ, కొత్త పాస్‌పోర్టు, గుర్తింపు కార్డు కోసం చేసిన అభ్యర్థనపై గానీ ఇప్పటివరకు అధికారిక ధ్రువీకరణ లేదు. హసీనా తిరిగి బంగ్లాదేశ్‌కు వస్తే అక్కడి రాజకీయ, న్యాయ రంగాల్లో కీలక పరిణామాలు చోటుచేసుకునే అవకాశం ఉందనే చర్చ జరుగుతోంది. ఈ అంశంపై ఆమె నుంచి లేదా సంబంధిత అధికారుల నుంచి అధికారిక ప్రకటన వెలువడాల్సి ఉంది.