ఐపీఎల్ 2027 మినీ వేలం.. జట్ల అవసరాలపై అంబటి రాయుడు కీలక అంచనాలు

ఐపీఎల్‌ 2027 మినీ వేలానికి ముందు ఫ్రాంచైజీలు తమ రిటైన్‌, రిలీజ్‌ జాబితాలను సిద్ధం చేస్తున్నాయి. మరోవైపు జట్ల మధ్య ప్లేయర్ల ట్రేడింగ్‌ కూడా ఊపందుకుంది. సన్‌రైజర్స్ హైదరాబాద్‌, చెన్నై సూపర్ కింగ్స్‌ ఇప్పటికే అధికారికంగా ఆటగాళ్ల మార్పిడి చేసుకున్నాయి. ఈ నేపథ్యంలో మాజీ క్రికెటర్ అంబటి రాయుడు పలు జట్ల అవసరాలు, వేలంలో అనుసరించాల్సిన వ్యూహాలపై తన అంచనాలను వెల్లడించాడు. ముంబయి ఇండియన్స్‌కు నాలుగో స్థానంలో బ్యాటింగ్‌ చేయగల, పేస్‌, స్పిన్‌ను సమర్థంగా ఎదుర్కొనే ఆటగాడు అవసరమని పేర్కొన్నాడు. పంజాబ్ కింగ్స్‌ నుంచి నెహాల్ వధేరా తిరిగి ముంబయికి రావచ్చని అభిప్రాయపడ్డాడు. రాయల్ ఛాలెంజర్స్ బెంగళూరు స్పిన్ విభాగాన్ని బలోపేతం చేసేందుకు యుజ్వేంద్ర చాహల్‌ను లక్ష్యంగా చేసుకోవచ్చని, గుజరాత్ టైటాన్స్ మిడిలార్డర్ కోసం వెంకటేశ్ అయ్యర్‌ను సంప్రదించే అవకాశం ఉందని అంచనా వేశాడు.

రిషభ్ పంత్‌ దిల్లీకి వెళ్లిన నేపథ్యంలో లఖ్‌నవూ సూపర్ జెయింట్స్‌ కెప్టెన్సీ బాధ్యతలకు యశస్వి జైస్వాల్‌ సరైన ఎంపిక కావచ్చని రాయుడు పేర్కొన్నాడు. కోల్‌కతా నైట్‌రైడర్స్‌ సూర్యకుమార్ యాదవ్‌ను తీసుకుని నాయకత్వ బాధ్యతలు అప్పగించే అవకాశం ఉందని అభిప్రాయపడ్డాడు. ప్యాట్ కమిన్స్‌ అందుబాటుపై సందేహాల నేపథ్యంలో సన్‌రైజర్స్ హైదరాబాద్‌ సామ్ కరన్‌ను తీసుకుంటే బౌలింగ్‌తో పాటు బ్యాటింగ్‌లోనూ ప్రయోజనం ఉంటుందని విశ్లేషించాడు. మరోవైపు దక్షిణాఫ్రికా మాజీ కెప్టెన్ ఫాఫ్ డుప్లెసిస్ కూడా ఐపీఎల్‌లో మూడు జట్లకు కొత్త సారథులు వచ్చే అవకాశం ఉందని అంచనా వేశాడు. ముంబయి ఇండియన్స్‌కు రోహిత్ శర్మ లేదా జస్‌ప్రీత్ బుమ్రా, లఖ్‌నవూకు ఐడెన్ మార్‌క్రమ్ లేదా మిచెల్ మార్ష్ కెప్టెన్ కావచ్చని పేర్కొన్నాడు. కోల్‌కతా నైట్‌రైడర్స్‌ రింకు సింగ్‌కు లేదా ట్రేడింగ్‌ ద్వారా హార్దిక్ పాండ్యను తీసుకుంటే ఆయనకు నాయకత్వ బాధ్యతలు అప్పగించవచ్చని అభిప్రాయపడ్డాడు.