వరల్డ్ కప్ 2026 లో హైయెస్ట్ స్కోర్ నమోదు చేసిన శ్రీలంక...

టీ20 వరల్డ్‌కప్‌ 2026 లో భాగంగా పల్లెకెలె వేదికగా జరుగుతున్న మ్యాచ్‌లో శ్రీలంక జట్టు ఒమన్‌పై ఆధిపత్యం చాటింది. టాస్‌ గెలిచిన ఒమన్‌ బౌలింగ్‌ ఎంచుకోగా, ముందుగా బ్యాటింగ్‌ చేసిన శ్రీలంక నిర్ణీత 20 ఓవర్లలో 5 వికెట్లు కోల్పోయి 225 పరుగుల భారీ స్కోర్‌ నమోదు చేసింది. కుశాల్‌ మెండిస్‌ 45 బంతుల్లో 61 పరుగులు చేసి జట్టుకు బలమైన పునాది వేశారు. పవన్‌ రత్నాయకే 28 బంతుల్లో 60 పరుగులు సాధించగా, కెప్టెన్‌ డాసున్‌ శనక దూకుడుగా ఆడాడు.

డాసున్‌ శనక కేవలం 19 బంతుల్లోనే అర్ధశతకం పూర్తి చేసి తన సొంత రికార్డును బద్దలు కొట్టాడు. 2023 లో భారత్‌పై సాధించిన 20 బంతుల అర్ధశతకాన్ని అధిగమించి, శ్రీలంక తరఫున అత్యంత వేగవంతమైన టీ20 అర్ధశతకాన్ని నమోదు చేశాడు. ఆయన దూకుడు ఇన్నింగ్స్‌తో శ్రీలంక ఈ టోర్నమెంట్‌లో ఇప్పటివరకు నమోదైన అత్యధిక స్కోర్‌ను సాధించింది. ఓపెనర్లు పాతుమ్‌ నిస్సాంక, కమిల్‌ మిషార ఆశించిన స్థాయిలో రాణించకపోయినా, చివర్లో కమిందు మెండిస్‌ 7 బంతుల్లో 19 నాటౌట్‌ పరుగులు జోడించాడు. ఒమన్‌ ప్రస్తుతం భారీ లక్ష్యాన్ని ఛేదించే ప్రయత్నంలో ఉండగా, మ్యాచ్‌ ఇంకా కొనసాగుతోంది.