టి20 వరల్డ్ కప్....నమీబియాపై టీమ్ ఇండియా విజయం

ఢిల్లీ వేదికగా జరిగిన ఐసీసీ పురుషుల టీ20 ప్రపంచకప్ 2026 గ్రూప్-A మ్యాచ్‌లో టీమిండియా నమీబియాపై ఘన విజయం సాధించింది. టాస్ గెలిచిన నమీబియా కెప్టెన్ గెర్హార్డ్ ఎరాస్మస్ ముందుగా బౌలింగ్ ఎంచుకోగా, భారత్ నిర్ణీత 20 ఓవర్లలో 9 వికెట్ల నష్టానికి 209 పరుగులు చేసింది. ఓపెనర్ ఇషాన్ కిషన్ కేవలం 24 బంతుల్లో 61 పరుగులు చేసి జట్టుకు అద్భుత ఆరంభాన్ని ఇచ్చాడు. అభిషేక్ శర్మ స్థానంలో జట్టులోకి వచ్చిన సంజూ శాంసన్ 7 బంతుల్లో 22 పరుగులు చేసి వేగంగా పరుగులు జోడించాడు. తొలి 6 ఓవర్లలోనే భారత్ 86 పరుగులు చేసి టీ20 ప్రపంచకప్ చరిత్రలో తన అత్యుత్తమ పవర్‌ప్లే స్కోరును నమోదు చేసింది.

ఒక దశలో స్కోరు 250 దాటుతుందని అనిపించినా, చివరి ఓవర్లలో నమీబియా బౌలర్లు పుంజుకోవడంతో భారత్ వరుసగా వికెట్లు కోల్పోయి 209 పరుగులకే పరిమితమైంది. హార్దిక్ పాండ్యా కీలక ఇన్నింగ్స్ ఆడగా, మధ్యలో శివమ్ దూబేతో కలిసి ముఖ్యమైన భాగస్వామ్యం నమోదు చేశాడు.

210 పరుగుల లక్ష్యంతో బరిలోకి దిగిన నమీబియా జట్టు భారత బౌలర్ల కట్టుదిట్టమైన బౌలింగ్‌ను ఎదుర్కోలేకపోయింది. రవి బిష్ణోయ్, వాషింగ్టన్ సుందర్, జస్ప్రీత్ బుమ్రా కీలక వికెట్లు తీసి ప్రత్యర్థిని తక్కువ స్కోరుకే పరిమితం చేశారు. చివరకు నమీబియా 116 పరుగులకే ఆలౌట్ కావడంతో భారత్ 93 పరుగుల తేడాతో విజయం సాధించింది.