మూడో టీ 20 లో భారత మహిళా టీమ్ ఘన విజయం, 3 -0 తో సిరీస్ విన్!

భారత మహిళా జట్టు మూడో టీ20లోనూ శ్రీలంకపై ఆధిపత్యం చూపుతూ 8 వికెట్ల తేడాతో ఘన విజయం సాధించింది. శుక్రవారం తిరువనంతపురంలోని గ్రీన్‌ఫీల్డ్ ఇంటర్నేషనల్ స్టేడియంలో జరిగిన ఈ మ్యాచ్‌తో, ఐదు మ్యాచ్‌ల టీ20 సిరీస్‌ను భారత్ 3-0తో ఇంకా రెండు మ్యాచ్‌లు మిగిలి ఉండగానే కైవసం చేసుకుంది.

113 పరుగుల లక్ష్యంతో బరిలోకి దిగిన భారత్ 13.2 ఓవర్లలోనే 115/2 చేసి సులువుగా విజయం సాధించింది. ఓపెనర్ షెఫాలీ వర్మ 42 బంతుల్లో 79 పరుగులతో మ్యాచ్‌ను ఏకపక్షంగా మలిచింది. జెమిమా రోడ్రిగ్స్ 9 పరుగులతో నాటౌట్‌గా నిలిచింది.

టాస్ గెలిచిన భారత్ ముందుగా బౌలింగ్ ఎంచుకుంది. భారత బౌలర్ల ధాటికి శ్రీలంక బ్యాటర్లు తడబడటంతో ఆ జట్టు 20 ఓవర్లలో 7 వికెట్ల నష్టానికి కేవలం 112 పరుగులే చేయగలిగింది. విష్మి గుణరత్నే 32 పరుగులతో శ్రీలంక తరఫున టాప్ స్కోరర్‌గా నిలవగా, చమరి ఆటపట్టు 18, హర్షిత సమరవిక్రమ 15 పరుగులు చేశారు. రేణుక సింగ్ ఠాకూర్ 4 వికెట్లు పడగొట్టగా, దీప్తి శర్మ 3 వికెట్లతో అద్భుతంగా రాణించింది. మధ్య ఓవర్లలో వరుసగా వికెట్లు పడటంతో శ్రీలంక భారీ స్కోరు సాధించలేకపోయింది. తొలి మూడు మ్యాచ్‌ల్లో గెలిచిన భారత్ సిరీస్ విన్ కాగా, నాలుగో టీ20 ఈనెల 28న, ఐదో టీ20 ఈనెల 30న జరగనున్నాయి.