సెమీస్ చేరాలంటే ఆటతీరులో మార్పు అవసరం: సునీల్ గావస్కర్

దక్షిణాఫ్రికాతో జరిగిన కీలక మ్యాచ్‌లో టీమ్ ఇండియా ఘోర పరాజయం చవిచూసింది. వరుసగా మూడు మ్యాచ్‌ల్లో డకౌట్లు అయిన అభిషేక్ శర్మ ఈ మ్యాచ్‌లో తన పరుగుల ఖాతా తెరిచినా, కేవలం 15 పరుగులకే అవుటై అభిమానులను నిరాశపరిచాడు. దక్షిణాఫ్రికా బౌలర్లు తెలివైన వ్యూహంతో అతడిని కట్టడి చేశారని మాజీ క్రికెటర్ సునీల్ గావస్కర్ విశ్లేషించారు. ఒత్తిడి కారణంగా అతడు స్వేచ్ఛగా ఆడలేకపోయాడని పేర్కొన్నారు.

భారత బ్యాటర్ల షాట్ సెలక్షన్ పేలవంగా ఉందని గావస్కర్ విమర్శించారు. డేవిడ్ మిల్లర్, డెవాల్డ్ బ్రేవిస్ పరిస్థితులకు తగ్గట్టు ఆడగా భారత బ్యాటర్లు విఫలమయ్యారని చెప్పారు. మరోవైపు తిలక్ వర్మ కేవలం ఒక్క పరుగుకే అవుటవడం నిరాశ కలిగించిందని, క్రీజులో కుదురుకుని భాగస్వామ్యం నెలకొల్పాల్సిన అవసరం ఉందని సూచించారు. సెమీస్ చేరాలంటే టీమ్ ఇండియా తన ఆట తీరును, నిర్ణయాలను మార్చుకోవాల్సిందేనని ఆయన స్పష్టం చేశారు.