బిగ్‌బాస్‌ 10లోకి జబర్దస్త్‌ కమెడియన్‌?

రాబోయే ‘బిగ్‌బాస్‌ తెలుగు సీజన్‌ 10’పై బుల్లితెర ప్రేక్షకుల్లో ఇప్పటికే భారీ ఆసక్తి నెలకొంది. ఈ సీజన్‌కు అక్కినేని నాగార్జున మరోసారి హోస్ట్‌గా వ్యవహరించనున్నారు. ఈసారి ‘దశావతారం’ కాన్సెప్ట్‌తో షోను రూపొందిస్తున్నట్లు ప్రచారం జరుగుతోంది. ఇప్పటికే విడుదలైన ప్రమోషనల్ కంటెంట్ ఆసక్తిని పెంచుతోంది. కొత్త రూల్స్‌, మైండ్‌ గేమ్స్‌, ఊహించని టాస్కులతో షో సాగనుందని వార్తలు వస్తున్నప్పటికీ, పూర్తి గేమ్‌ ఫార్మాట్‌పై అధికారిక స్పష్టత రావాల్సి ఉంది.

ఇక కంటెస్టెంట్లుగా వినిపిస్తున్న పేర్లలో జబర్దస్త్‌ ఫేమ్‌ కమెడియన్‌ రాంప్రసాద్‌ పేరు ప్రస్తుతం హాట్‌టాపిక్‌గా మారింది. సోషల్‌ మీడియాలో వస్తున్న కథనాల ప్రకారం. బిగ్‌బాస్‌ మేకర్స్‌ రాంప్రసాద్‌ను సంప్రదించారని, షోలో పాల్గొనేందుకు ఆయన అంగీకరించారని ప్రచారం జరుగుతోంది. అలాగే టెంపర్‌ ఫేమ్‌ వంశీ, యువ నటుడు ఆదిత్య, బుల్లితెర నటి సుహాసిని, యాంకర్‌ వర్షిణి, సీరత్‌ కపూర్‌, సోషల్‌ మీడియా ఇన్‌ఫ్లుయెన్సర్‌ సౌందర్య, కమెడియన్‌ నరేష్‌ పేర్లు కూడా వినిపిస్తున్నాయి. సామాన్యుల ఎంపిక కోసం ‘అగ్నిపరీక్ష 2’ ప్రక్రియ కూడా కొనసాగుతోంది.

‘దశావతారం’ కాన్సెప్ట్‌, నాగార్జున హోస్టింగ్‌, వైరల్‌ అవుతున్న కంటెస్టెంట్ల పేర్లతో ‘బిగ్‌బాస్‌ తెలుగు 10’పై అంచనాలు మరింత పెరుగుతున్నాయి. అయితే కంటెస్టెంట్ల జాబితాతో పాటు కొత్త గేమ్‌ ఫార్మాట్‌కు సంబంధించిన వివరాలను మేకర్స్‌ ఇంకా అధికారికంగా ప్రకటించలేదు. ఈ సీజన్‌ సెప్టెంబర్‌ తొలి వారంలో ప్రారంభం కానుందని సమాచారం. దీంతో అధికారిక ప్రకటనల కోసం ప్రేక్షకులు ఆసక్తిగా ఎదురుచూస్తున్నారు.