‘అమ్మాయిగా మారి పదేళ్లు’.. భావోద్వేగ పోస్ట్‌ చేసిన బిగ్‌బాస్ ఫేమ్ ప్రియాంక సింగ్

బిగ్‌బాస్ తెలుగు ఫేమ్ ప్రియాంక సింగ్ తన జీవితంలోని కీలక మైలురాయిని గుర్తుచేసుకుంటూ భావోద్వేగ పోస్ట్‌ చేశారు. సాయి తేజగా ‘జబర్దస్త్’తో పాటు పలు టీవీ షోల్లో ప్రేక్షకులను అలరించిన ఆమె.. అనంతరం జెండర్ అఫర్మింగ్ సర్జరీ చేయించుకుని ప్రియాంక సింగ్‌గా కొత్త జీవితాన్ని ప్రారంభించారు. ఆ తర్వాత బిగ్‌బాస్ తెలుగు సీజన్ 5లో కంటెస్టెంట్‌గా పాల్గొని తన ఆటతీరు, మాటతీరుతో మంచి గుర్తింపు తెచ్చుకున్నారు. తాజాగా తన ట్రాన్స్‌ఫర్మేషన్ జర్నీకి పదేళ్లు పూర్తైన సందర్భంగా నాటి అనుభవాలను గుర్తుచేసుకున్నారు.

తన ప్రయాణంలో ఎదురైన నొప్పి, కన్నీళ్లు, నిద్రలేని రాత్రులు, ఒంటరితనం, అనిశ్చితి వంటి ఎన్నో కఠిన పరిస్థితులను ప్రియాంక తన పోస్ట్‌లో ప్రస్తావించారు. ఎన్ని సవాళ్లు ఎదురైనా తనను తాను ఎప్పుడూ వదులుకోలేదని తెలిపారు. ప్రస్తుతం ప్రశాంతంగా, సంతోషంగా తనకు నచ్చిన విధంగా జీవిస్తున్నానని పేర్కొన్నారు. తనకు ఈ జీవితాన్ని, ముందుకు సాగే శక్తిని అందించిన విశ్వానికి కృతజ్ఞతలు తెలిపారు. ఆమె షేర్ చేసిన పోస్ట్, ఫొటోలు సోషల్ మీడియాలో వైరల్‌గా మారగా.. అభిమానులు, నెటిజన్లు ప్రియాంక ధైర్యాన్ని ప్రశంసిస్తున్నారు.