

విడుదల తేదీ: నవంబర్ 19, 2026
నటీనటులు: విశ్వక్ సేన్, మాగంటి శ్రీనాథ్, అభినవ్ గోమఠం, వెంకటేష్ కాకుమాను, శివాత్మిక రాజశేఖర్ తదితరులు.
దర్శకుడు: తరుణ్ భాస్కర్
నిర్మాతలు: సృజన్ యరబోలు, సందీప్ నాగిరెడ్డి
సంగీత దర్శకుడు: వివేక్ సాగర్
సినిమాటోగ్రాఫర్: ఏజే ఆరోన్
ఎడిటర్: రవితేజ గిరిజాల
కథ:
వివేక్, కార్తీక్, కౌశిక్, ఉపేంద్ర నలుగురు మంచి స్నేహితులు. మొదటి సినిమా పరాజయం తర్వాత ఎదురైన సమస్యలతో ఒక్కొక్కరు ఒక్కో దారిలో తమ జీవితాలను కొనసాగిస్తారు. వివేక్ అప్పులు తీర్చేందుకు వెడ్డింగ్ మేనేజ్మెంట్ కంపెనీలో పనిచేస్తుండగా, కౌశిక్ నటుడిగా స్థిరపడతాడు. ఉపేంద్ర ఎడిటర్గా, కార్తీక్ సినిమాటోగ్రాఫర్గా కొనసాగుతుంటారు. ఈ క్రమంలో అనుకోని పరిణామాల మధ్య కార్తీక్, ఉపేంద్ర కజిన్ కీర్తనతో ప్రేమలో పడతాడు. అయితే అప్పటికే ఆమెకు మరో వ్యక్తితో పెళ్లి నిశ్చయమై ఉంటుంది. మరి కీర్తన ప్రేమను గెలుచుకోవడానికి కార్తీక్ ఏం చేశాడు? అతడి ప్రేమ కోసం మిగిలిన ముగ్గురు స్నేహితులు ఎలా సహకరించారు? ఈ ప్రయాణంలో ఎదురైన సమస్యలను వారు ఎలా అధిగమించారు? అనేదే మిగిలిన కథ.
ప్లస్ పాయింట్లు:
దర్శకుడు తరుణ్ భాస్కర్ తనదైన రచన, పాత్రల రూపకల్పనతో మరోసారి ఆకట్టుకున్నారు. నాలుగు ప్రధాన పాత్రలను ఆసక్తికరంగా తీర్చిదిద్దడంతో పాటు, వాటి చుట్టూ కథనాన్ని నడిపించిన విధానం బాగుంది. ట్రెండీ డైలాగ్స్ ప్రేక్షకులను అలరిస్తాయి. ముఖ్యంగా కౌశిక్ పాత్రలో అభినవ్ గోమఠం తన కామెడీ టైమింగ్, హావభావాలతో అద్భుతంగా నవ్వించారు. అడవిలో జరిగే సన్నివేశాలు, ముఖ్యంగా ఎలుగుబంటితో ఆయనకు ఎదురయ్యే అనుభవాలు సినిమాలోని ప్రధాన ఆకర్షణల్లో నిలుస్తాయి. వివేక్ పాత్రలో విశ్వక్ సేన్ బాగానే నటించగా, ఉపేంద్రగా వెంకటేష్ కాకుమాను, కార్తీక్గా మాగంటి శ్రీనాథ్ తమ పాత్రలకు న్యాయం చేశారు. శివాత్మిక రాజశేఖర్ కూడా మంచి నటనను కనబరిచారు. ఇతర నటీనటుల నటన, అతిథి పాత్రలు సినిమాకు మరింత వినోదాన్ని జోడించాయి. ముఖ్యంగా ఫస్టాఫ్లోని కామెడీ సన్నివేశాలు ప్రేక్షకులను బాగా ఆకట్టుకుంటాయి.
మైనస్ పాయింట్లు:
మొదటి భాగానికి భిన్నమైన నేపథ్యాన్ని ఎంచుకున్నప్పటికీ, ఈ సీక్వెల్ కథనం విషయంలో అదే తరహాను అనుసరించింది. నలుగురు స్నేహితులు మరోసారి సమస్యల్లో చిక్కుకుని, తమను తాము నిరూపించుకోవడానికి సినిమా తీయాల్సిన పరిస్థితి ఆసక్తికరంగా ఉన్నప్పటికీ, కథలో కొత్తదనం కొరవడింది. కొన్ని సన్నివేశాలు రొటీన్గా, ఊహించినట్లుగానే సాగుతాయి. ముఖ్యంగా వివేక్ పాత్రను మరింత ప్రభావవంతంగా ఉపయోగించుకునే అవకాశం ఉన్నా, దాన్ని పూర్తిస్థాయిలో వినియోగించుకోలేకపోయారు. కార్తీక్ పాత్రలో మాగంటి శ్రీనాథ్ బాగానే నటించినప్పటికీ, మొదటి భాగంలో సాయి సుశాంత్ రెడ్డిని చూసిన ప్రేక్షకులు కొత్త నటుడిని అలవాటు చేసుకోవడానికి కొంత సమయం పడుతుంది. ఇక క్లైమాక్స్ కూడా ఆశించిన స్థాయిలో లేదు. ప్రధాన సంఘర్షణకు మరింత బలమైన, భావోద్వేగపూరితమైన ముగింపు ఇచ్చి ఉంటే సినిమా మరింత మెరుగ్గా ఉండేది.
సాంకేతిక విభాగం:
సాంకేతికంగా సినిమా మంచి స్థాయిలో ఉంది. సినిమాటోగ్రాఫర్ ఏజే ఆరోన్ అందించిన విజువల్స్ ప్రత్యేక ఆకర్షణగా నిలిచాయి. ముఖ్యంగా కామెడీ, కీలక సన్నివేశాల్లో ఆయన పనితనం బాగుంది. వివేక్ సాగర్ అందించిన నేపథ్య సంగీతం కథనానికి తగ్గట్టుగా సాగుతూ కొన్ని సన్నివేశాలను మరింత ఆకట్టుకునేలా చేసింది. ఎడిటర్ రవితేజ గిరిజాల తన పనితనంతో సినిమాను చక్కగా మలిచారు. నిర్మాతలు సృజన్ యరబోలు, సందీప్ నాగిరెడ్డి పాటించిన నిర్మాణ విలువలు బాగున్నాయి. తరుణ్ భాస్కర్ దర్శకత్వం, సంభాషణలు సినిమాకు ప్రధాన బలంగా నిలిచాయి.
తీర్పు:
మొత్తంగా ఈ నగరానికి ఏమైంది? రిపీట్ ఒక సరదాగా సాగే బడ్డీ కామెడీ డ్రామా. తరుణ్ భాస్కర్ డైలాగ్స్, అభినవ్ గోమఠం అద్భుతమైన కామెడీ టైమింగ్, ఇతర నటీనటుల నటన సినిమాను వినోదాత్మకంగా నిలబెట్టాయి. ముఖ్యంగా ఫస్టాఫ్లోని కామెడీ సన్నివేశాలు ప్రేక్షకులను బాగా నవ్విస్తాయి. అయితే రొటీన్ కథనం, కొన్ని చోట్ల ఆసక్తి తగ్గడం, ఆశించిన స్థాయిలో లేని క్లైమాక్స్ సినిమాకు బలహీనతలుగా నిలిచాయి. ఈ లోపాలు ఉన్నప్పటికీ, ఓవరాల్గా సినిమా ప్రేక్షకులను మంచి స్థాయిలో అలరిస్తుంది.
రేటింగ్: 2.5/5














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!