

ఎన్నికల వ్యవస్థలో సంస్కరణలు తీసుకురావాలనే ఉద్దేశంతోనే మున్సిపల్ ఎన్నికలను ప్రత్యక్ష ఎన్నికల విధానంలో నిర్వహిస్తున్నామని ముఖ్యమంత్రి చంద్రబాబు నాయుడు తెలిపారు. ఎన్నికల్లో ధన ప్రవాహాన్ని అరికట్టేందుకు ప్రభుత్వం ప్రయత్నిస్తోందని చెప్పారు. అభ్యర్థులు ఇచ్చిన డబ్బులను తీసుకోకుండా, కొందరు ఓటర్లు వాటిని బాలెట్ బాక్సుల్లో వేయడం తనకు సంతోషాన్ని కలిగించిందన్నారు. ఇదే విధంగా ప్రభుత్వం చేపట్టే కార్యక్రమాలకు ప్రజలు సహకరించాలని కోరారు. రాష్ట్రంలో కరువు, తుపాన్ల వల్ల కలిగే నష్టాలను శాశ్వతంగా అధిగమించేందుకు చర్యలు తీసుకుంటున్నామని తెలిపారు. రాయలసీమను హార్టికల్చర్ హబ్గా అభివృద్ధి చేస్తున్నామని, మార్చి నాటికి పోలవరం ప్రాజెక్టును పూర్తి చేయాలనే లక్ష్యంతో పనిచేస్తున్నామని వెల్లడించారు. పంట నష్టాలతో ఇబ్బందులు పడుతున్న రైతులకు పంటల బీమాపై అవగాహన కల్పిస్తున్నామని, తుపాను బాధితులు, రైతులను ప్రభుత్వం ఆదుకుంటుందని భరోసా ఇచ్చారు. రెండు తుపాన్ల సమయంలో నిబద్ధతతో పనిచేసి ప్రాణనష్టాన్ని తగ్గించగలిగామని పేర్కొన్నారు. రాష్ట్రంలో అభివృద్ధి, సంక్షేమ కార్యక్రమాలను కొనసాగిస్తూ ఆర్థిక అసమానతలను తగ్గించడమే లక్ష్యంగా పనిచేస్తున్నామని, అమరావతిని అత్యుత్తమ రాజధానిగా తీర్చిదిద్దుతామని చెప్పారు.
వైసీపీ పాలనలో రాష్ట్రానికి తీవ్ర అన్యాయం జరిగిందని చంద్రబాబు విమర్శించారు. ఎన్నికల్లో హింస, కుట్రలతో గెలవాలని వైసీపీ ప్రయత్నించిందని, అయితే ప్రజలు ఆ పార్టీకి తగిన సమాధానం చెప్పారని వ్యాఖ్యానించారు. ప్రజల విశ్వాసమే రాజకీయ పార్టీలకు ముఖ్యమని, ఇటీవల జరిగిన ఎన్నికల్లో ప్రజలు కూటమిపై మరింత నమ్మకం వ్యక్తం చేశారని అన్నారు. కొందరు ఎమ్మెల్యేల పనితీరును ప్రజలు తిరస్కరించారని, ఆయా నియోజకవర్గాల్లో వచ్చిన ప్రతికూల ఫలితాలపై సమీక్ష చేస్తున్నామని తెలిపారు. సంబంధిత ఎమ్మెల్యేలను పిలిచి మాట్లాడుతున్నామని, పనితీరు మార్చుకోకపోతే చర్యలు తప్పవని హెచ్చరించారు. కొత్తగా ఎన్నికైన ప్రజాప్రతినిధులు కూడా తమ పరిధిని దాటి ప్రవర్తించవద్దని సూచించారు. ఇదే సందర్భంగా షర్మిల వివాహానికి అప్పటి ముఖ్యమంత్రి వైఎస్ రాజశేఖర్ రెడ్డి తనను ఆహ్వానించారని, తాను కూడా పెళ్లికి హాజరయ్యానని చంద్రబాబు గుర్తుచేసుకున్నారు. 1983 వరకు వైఎస్ తనకు మంచి స్నేహితుడని, రాజకీయంగా విభేదించినప్పటికీ తాను ఎప్పుడూ హద్దులు దాటలేదని అన్నారు. కానీ జగన్ తన సొంత చెల్లిపై కూడా విమర్శలు చేస్తున్నారని ఆరోపించారు. ప్రతిపక్షంలో ఉన్నా, అధికారంలో ఉన్నా వైసీపీ అరాచకాలకు పాల్పడుతోందని విమర్శించారు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!