ఎల్డీఎఫ్‌కు ఓటు వేస్తే బీజేపీకి ఓటు వేసిన‌ట్లే.. కేరళ ఎన్నికల ప్రచారం లో సీఎం రేవంత్

తెలంగాణ ముఖ్యమంత్రి రేవంత్ రెడ్డి కేరళ ఎన్నికల ప్రచారంలో ఘాటైన వ్యాఖ్యలు చేశారు. ఎల్డీఎఫ్‌కు ఓటు వేయడం అంటే బీజేపీకి ఓటు వేసినట్లేనని అన్నారు. కాంగ్రెస్ పార్టీ తరఫున స్టార్ ప్రచారకర్తగా ఆయన నేమం సహా పలు నియోజకవర్గాల్లో ప్రచారం నిర్వహించారు. యూడీఎఫ్ అభ్యర్థి శబరీనాథన్‌కు మద్దతుగా రోడ్ షో నిర్వహించగా ప్రజల నుంచి మంచి స్పందన లభించింది.

బీజేపీ మరియు ఎల్డీఎఫ్ మధ్య లోపలి ఒప్పందం ఉందని రేవంత్ రెడ్డి ఆరోపించారు. బయటకు వేర్వేరు భావజాలాలు ఉన్నట్లే కనిపించినా, వారి చర్యలు ఒకేలా ఉన్నాయని విమర్శించారు. అభివృద్ధి పనులు నిలిచిపోయాయని, ఉద్యోగ అవకాశాల లేమితో యువత విదేశాలకు వెళ్తోందని ఆయన పేర్కొన్నారు.

కేరళ ప్రజలు బీజేపీ, ఎల్డీఎఫ్ పార్టీలకు గుణపాఠం చెప్పాలని, యూడీఎఫ్‌కు మద్దతు ఇవ్వాలని పిలుపునిచ్చారు. పేదలు, మధ్యతరగతి, యువతకు న్యాయం చేయగలిగేది కాంగ్రెస్ పార్టీనేనని అన్నారు. రాష్ట్ర అభివృద్ధి కోసం గౌరవంతో కూడిన ప్రగతిని తీసుకువస్తామని హామీ ఇచ్చారు. ఎన్నికల్లో కాంగ్రెస్ విజయం సాధిస్తుందని ఆయన నమ్మకం వ్యక్తం చేశారు.