'నేను మూడోసారి అధ్యక్షుడిని'.. ట్రంప్ వ్యాఖ్యలు కలకలం

అమెరికా అధ్యక్షుడు డొనాల్డ్ ట్రంప్ మరోసారి తన వ్యాఖ్యలతో రాజకీయ చర్చకు తెరతీశారు. అమెరికా 250వ స్వాతంత్ర్య వేడుకల సందర్భంగా నిర్వహించిన బహిరంగ సభలో ప్రసంగించిన ట్రంప్, తాను ప్రస్తుతం మూడోసారి అధ్యక్షుడిగా పనిచేస్తున్నానని వ్యాఖ్యానించారు. వాస్తవానికి ఆయన రెండోసారి అధ్యక్ష బాధ్యతలు నిర్వర్తిస్తున్నప్పటికీ, 2020 అధ్యక్ష ఎన్నికల్లో తన విజయం దోచుకున్నారనే తన పాత ఆరోపణలను మరోసారి ప్రస్తావించారు. అనంతరం వివాదాస్పద అంశాల్లోకి వెళ్లదలచుకోలేదని నవ్వుతూ తన ప్రసంగాన్ని కొనసాగించారు.

అమెరికా ప్రపంచంలో అత్యంత శక్తివంతమైన దేశంగా ఎదగడంలో తన తొలి పాలనలో సైన్యాన్ని పునర్నిర్మించి, రక్షణ సామర్థ్యాలను బలోపేతం చేసిన విషయాన్ని ట్రంప్ గుర్తుచేశారు. 2020 ఎన్నికల ఫలితాలను ఆయన అప్పటినుంచే సవాల్ చేస్తూ వచ్చినప్పటికీ, ఆ ఆరోపణలకు న్యాయస్థానాల్లో ఆమోదయోగ్యమైన ఆధారాలు సమర్పించలేకపోయారు. అనంతరం 2021 జనవరిలో అమెరికా క్యాపిటల్ భవనం వద్ద జరిగిన ఘటనతో ఈ వివాదం మరింత ముదిరింది.