ట్రంప్ నిర్ణయంతో కెనడాకు గాజా శాంతి మండలి ఆహ్వానం రద్దు

కెనడా ప్రధాని మార్క్ కార్నీ దావోస్ వేదికగా ట్రంప్ గ్రీన్‌లాండ్ సుంకాలను తీవ్రంగా విమర్శించిన నేపథ్యంలో, గాజా శాంతి మండలిలో చేరాలంటూ కెనడాకు ఇచ్చిన ఆహ్వానాన్ని అమెరికా అధ్యక్షుడు డొనాల్డ్ ట్రంప్ వెనక్కి తీసుకున్నారు. ఈ నిర్ణయాన్ని ట్రంప్ సోషల్ మీడియాలో ప్రకటిస్తూ, గాజా శాంతి మండలి ఇప్పటివరకు ఏర్పాటైన ప్రతిష్టాత్మక అంతర్జాతీయ బోర్డుల్లో ఒకటిగా పేర్కొన్నారు. కార్నీ వ్యాఖ్యల తర్వాత తీసుకున్న ఈ చర్య అంతర్జాతీయ వేదికలపై చర్చనీయాంశంగా మారింది.

ఇటీవల దావోస్‌లో జరిగిన ప్రపంచ ఆర్థిక వేదిక సమావేశంలో కార్నీ మాట్లాడుతూ, అమెరికా ఆధిపత్యంలో ప్రపంచం పరివర్తన వైపు కాకుండా విచ్ఛిన్నం వైపు సాగుతోందని వ్యాఖ్యానించారు. గతంలో భాగస్వామ్య దేశాల శ్రేయస్సు కోసం చేసిన ఆర్థిక ఒప్పందాలను ఇప్పుడు ఆయుధాల్లా ఉపయోగిస్తున్నారని, అసమాన వాణిజ్య నియమాలు అమలవుతున్నాయని విమర్శించారు. ఇదే తరహాలో జేపీ మోర్గాన్ సీఈఓ జామీ డిమోన్ కూడా ట్రంప్ సుంకాల విధానాన్ని తప్పుబట్టారు. ఈ విధానాల వల్ల అమెరికా అంతర్జాతీయ విశ్వసనీయతను కోల్పోయే ప్రమాదం ఉందని, దానివల్ల ఇతర దేశాలు ఏకమయ్యే అవకాశం ఉందని హెచ్చరించారు. కార్నీ చైనా పర్యటనతో పాటు త్వరలో భారత్ పర్యటనకు అవకాశం ఉందని డిమోన్ ప్రస్తావించారు.