పోలవరం–బనకచర్ల ప్రాజెక్టుపై తెలంగాణ సర్కార్ ద్వంద్వ వైఖరి.. కవిత విమర్శలు

పోలవరం–బనకచర్ల లింక్ ప్రాజెక్టు విషయంలో తెలంగాణ ప్రభుత్వం అనుసరిస్తున్న ద్వంద్వ వైఖరి మరోసారి బయటపడిందని తెలంగాణ జాగృతి అధ్యక్షురాలు కవిత విమర్శించారు. ఎక్స్ వేదికగా ఆమె ఈ అంశంపై స్పందించారు. గోదావరి–కావేరి నదుల అనుసంధానాన్ని సమ్మక్క సాగర్ (తుపాకులగూడెం) నుంచి చేపట్టాలని అధికారులు జాతీయ జల అభివృద్ధి సంస్థ (ఎన్‌డబ్ల్యూడీఏ) సమావేశాల్లో కోరుతుండగా.. మరోవైపు దక్షిణాది రాష్ట్రాల మండలి సమావేశంలో ముఖ్యమంత్రి రేవంత్ రెడ్డి పోలవరం–బనకచర్ల లింక్ ప్రాజెక్టుకు అంగీకారం తెలిపారని ఆరోపించారు. నదీ జలాల వినియోగంపై ప్రభుత్వానికి స్పష్టమైన అవగాహన, విధానం లేదని విమర్శించారు. ఈ ప్రాజెక్టు తెలంగాణ నీటి హక్కులకు భంగం కలిగిస్తుందని 2024లోనే తెలంగాణ జాగృతి తరఫున తాము అభ్యంతరం వ్యక్తం చేశామని గుర్తుచేశారు. తెలంగాణకు హక్కుగా దక్కాల్సిన 250 టీఎంసీల గోదావరి జలాలను ఏపీకి అప్పగించడం రాష్ట్ర ప్రయోజనాలకు నష్టం కలిగిస్తుందని పేర్కొన్నారు.

కేంద్ర జలశక్తి శాఖ మంత్రి ఆధ్వర్యంలో జరిగిన ఏపీ, తెలంగాణ ముఖ్యమంత్రుల సమావేశంలోనూ రేవంత్ రెడ్డి ఈ ప్రాజెక్టుకు అంగీకారం తెలిపి, అనంతరం మీడియా ముందు వాస్తవాలను వక్రీకరించారని కవిత ఆరోపించారు. ముఖ్యమంత్రి ఆమోదంతోనే ఏపీ ప్రభుత్వం ఈ ప్రాజెక్టును నదుల అనుసంధానంలో భాగంగా చేపట్టేందుకు కేంద్రంపై ఒత్తిడి తెస్తోందని విమర్శించారు. ఇప్పటికైనా రాష్ట్ర ప్రభుత్వం స్పందించి తెలంగాణకు కలిగే నష్టాన్ని గుర్తించాలని డిమాండ్ చేశారు. ఈ ప్రాజెక్టుకు సంబంధించి కేంద్రం చేపడుతున్న అన్ని సంప్రదింపుల నుంచి తెలంగాణ వైదొలగాలని, ప్రాజెక్టును అడ్డుకోవాలని కోరుతూ ప్రధానమంత్రి నరేంద్ర మోదీకి ముఖ్యమంత్రి రేవంత్ రెడ్డి లేఖ రాయాలని కవిత డిమాండ్ చేశారు.