జెడ్పీటీసీ, ఎంపీటీసీ ఎన్నికలపై చంద్రబాబు కీలక దిశానిర్దేశం

అమరావతిలో కూటమి పార్టీల ముఖ్య నేతలు, కార్యకర్తలతో ముఖ్యమంత్రి చంద్రబాబు నాయుడు టెలీకాన్ఫరెన్స్ నిర్వహించారు. ఈ సమావేశంలో మంత్రి నాదెండ్ల మనోహర్‌తో పాటు టీడీపీ రాష్ట్ర అధ్యక్షుడు పల్లా శ్రీనివాస్, బీజేపీ రాష్ట్ర అధ్యక్షుడు పీవీఎన్ మాధవ్ పాల్గొన్నారు. ఇటీవల జరిగిన పట్టణ స్థానిక సంస్థల ఎన్నికల్లో కూటమి సాధించిన విజయంపై నేతలు, కార్యకర్తలకు చంద్రబాబు అభినందనలు తెలిపారు. మున్సిపాలిటీలు, కార్పొరేషన్లలో కూటమి 94 శాతం స్ట్రైక్ రేట్ సాధించిందని పేర్కొన్నారు. రెండున్నరేళ్లుగా ప్రభుత్వం అమలు చేస్తున్న సంక్షేమం, అభివృద్ధి, సుపరిపాలనకు ప్రజలు గుర్తింపు ఇచ్చారని అన్నారు. ఆర్థిక ఇబ్బందులు ఉన్నప్పటికీ సంక్షేమ పథకాలను కొనసాగిస్తూ అభివృద్ధి కార్యక్రమాలు చేపడుతున్నామని, డీఎస్సీతో పాటు ఉద్యోగ క్యాలెండర్ ద్వారా వివిధ శాఖల్లో ఖాళీలను భర్తీ చేస్తున్నామని వివరించారు. ప్రజలతో మమేకమై, వారి అభిప్రాయాలకు అనుగుణంగా పాలన సాగించడం వల్లే ఎన్నికల్లో మంచి ఫలితాలు వచ్చాయని అభిప్రాయపడ్డారు.

రాబోయే జెడ్పీటీసీ, ఎంపీటీసీ ఎన్నికల్లోనూ ఇదే ఐక్యత, సమన్వయంతో పనిచేసి అన్ని జెడ్పీ, ఎంపీపీ స్థానాలను కైవసం చేసుకునేలా కృషి చేయాలని చంద్రబాబు నేతలకు సూచించారు. కూటమిలోని ప్రతి పార్టీ అభ్యర్థిని తమ అభ్యర్థిగానే భావించి పనిచేయాలని, పొత్తు ధర్మాన్ని తప్పనిసరిగా పాటించాలని స్పష్టం చేశారు. స్థానిక ఎన్నికల్లో సీట్లు ఆశించి దక్కించుకోలేని నేతలకు నామినేటెడ్ పదవుల్లో న్యాయం చేస్తామని హామీ ఇచ్చారు. అయితే, కూటమి నిర్ణయాలకు విరుద్ధంగా వ్యవహరించే వారిని ఉపేక్షించబోమని హెచ్చరించారు. రాజకీయ పాలనతో పాటు సుపరిపాలనకు సమాన ప్రాధాన్యం ఇస్తున్నామని తెలిపారు. ప్రతిపక్ష వైఎస్సార్‌సీపీపై కూడా విమర్శలు చేస్తూ, ఓటమి భయంతో కూటమి ప్రభుత్వంపై ఆరోపణలు చేస్తోందని అన్నారు. కార్యకర్తలు సంయమనం పాటిస్తూ, ఐక్యతను కాపాడుకోవాలని పిలుపునిచ్చారు.