ఎమ్మెల్సీ ఎన్నికల్లో రెండు స్థానాల గెలుపే లక్ష్యం.. కాంగ్రెస్ నేతలకు రేవంత్ రెడ్డి దిశానిర్దేశం

ఢిల్లీలో సీఎం రేవంత్ రెడ్డి నివాసంలో మంత్రులు, ఎంపీలు, ఎమ్మెల్సీలు, డీసీసీలతో నిర్వహించిన సమావేశం ముగిసింది. ఎమ్మెల్సీ ఎన్నికల్లో అనుసరించాల్సిన వ్యూహంపై సీఎం రేవంత్ రెడ్డి పార్టీ నేతలకు దిశానిర్దేశం చేశారు. రెండు ఎమ్మెల్సీ స్థానాల్లోనూ విజయం సాధించడమే లక్ష్యంగా ప్రతి ఒక్కరూ సమన్వయంతో పనిచేయాలని సూచించారు. ఎన్నికలను ఎవరూ తేలికగా తీసుకోవద్దని, పార్టీ శ్రేణులు పూర్తి స్థాయిలో కృషి చేయాలని స్పష్టం చేశారు.

ఈ ఎన్నికల ఫలితాలు భవిష్యత్తులో జరగనున్న ఎన్నికలపై, పార్టీపై ప్రభావం చూపుతాయని సీఎం రేవంత్ రెడ్డి పేర్కొన్నారు. రెండు స్థానాల్లో గెలుపు బాధ్యతను ఆయా జిల్లాల మంత్రులు తీసుకోవాలని సూచించారు. పీసీసీ అధ్యక్షుడు, ఎమ్మెల్యేలు, ఎమ్మెల్సీలు, డీసీసీలు పరస్పర సమన్వయంతో ముందుకు సాగాలని పిలుపునిచ్చారు. ఎన్నికల్లో మొదటి స్థానంలో నిలవడమే ముఖ్యమని, రెండో స్థానానికి విలువ ఉండదని వ్యాఖ్యానిస్తూ, గెలుపే లక్ష్యంగా పనిచేయాలని నేతలకు స్పష్టం చేశారు.