నిర్బంధాలతో ప్రతిపక్షాలను భయపెట్టలేరు.. కాంగ్రెస్‌కు కేటీఆర్ హెచ్చరిక!

బీఆర్‌ఎస్‌ మాజీ ఎమ్మెల్యే పట్నం నరేందర్‌రెడ్డి అరెస్టును ఆ పార్టీ కార్యనిర్వాహక అధ్యక్షుడు కేటీఆర్ తీవ్రంగా ఖండించారు. పార్టీ కార్యకర్త అంత్యక్రియలకు హాజరయ్యేందుకు వెళ్తున్న నాయకుడిని అరెస్టు చేయడం ప్రభుత్వ నిరంకుశ వైఖరికి నిదర్శనమని విమర్శించారు. బాధిత కుటుంబాన్ని పరామర్శించేందుకు వెళ్తున్న నాయకుడిని అడ్డుకోవాల్సిన అవసరం ఏముందని ప్రశ్నించారు. కార్యకర్త కుటుంబానికి అండగా నిలవడం కూడా ఇందిరమ్మ రాజ్యంలో నేరంగా మారిందా అంటూ కాంగ్రెస్ ప్రభుత్వ తీరుపై ఆగ్రహం వ్యక్తం చేశారు.

ప్రతిపక్షాలను నిర్బంధాలతో భయపెట్టడమే కాంగ్రెస్ పాలనలో భాగంగా మారిందని కేటీఆర్ ఆరోపించారు. ప్రభుత్వ కక్షసాధింపు చర్యలకు బీఆర్‌ఎస్‌ ఏమాత్రం భయపడబోదని స్పష్టం చేశారు. ప్రజలు, పార్టీ కార్యకర్తల పక్షాన తమ పోరాటం కొనసాగుతుందని తెలిపారు. పట్నం నరేందర్‌రెడ్డిని ఎలాంటి షరతులు లేకుండా తక్షణమే విడుదల చేయాలని కాంగ్రెస్ ప్రభుత్వాన్ని డిమాండ్ చేశారు.