మమ్ముట్టి పర్యటనపై రాజకీయ దుమారం.. స్పందించిన బీజేపీ నేత!

మలయాళ స్టార్ హీరో మమ్ముట్టి సోషల్ మీడియాలో విమర్శలు ఎదుర్కొంటున్నారు. బీజేపీ కేరళ రాష్ట్ర ఉపాధ్యక్షుడు, అడ్వకేట్ బి. గోపాలకృష్ణన్ ఇంటికి ఆయన వెళ్లడం ఈ వివాదానికి కారణమైంది. గోపాలకృష్ణన్ కుమార్తె వివాహానికి హాజరుకాలేకపోయిన మమ్ముట్టి.. నూతన వధూవరులను అభినందించేందుకు తాజాగా ఆయన నివాసానికి వెళ్లారు. అయితే ఈ పర్యటనకు సంబంధించిన వీడియోలు సోషల్ మీడియాలో వైరల్ కావడంతో సీపీఎం మద్దతుదారులుగా భావిస్తున్న కొందరు నెటిజన్లు మమ్ముట్టిపై విమర్శలు గుప్పించారు. కాగా, గోపాలకృష్ణన్ కుమార్తె వివాహానికి కేరళ ముఖ్యమంత్రి పినరయి విజయన్, ప్రతిపక్ష నేత వి.డి. సతీశన్‌తో పాటు పలువురు కేంద్ర, రాష్ట్ర మంత్రులు, రాజకీయ ప్రముఖులు హాజరయ్యారు.

ఈ వివాదంపై అడ్వకేట్ బి. గోపాలకృష్ణన్ స్పందించారు. మమ్ముట్టిపై సోషల్ మీడియాలో విమర్శలు చేస్తున్నవారు నిజమైన సీపీఎం కార్యకర్తలు కాదని, ఆ పార్టీ మద్దతుదారులుగా నటిస్తున్నవారని ఆరోపించారు. అన్ని పార్టీల నాయకులతో తనకు సత్సంబంధాలు ఉన్నాయని, తన కుమార్తె వివాహానికి ముఖ్యమంత్రి పినరయి విజయన్, ప్రతిపక్ష నేత వి.డి. సతీశన్‌తో పాటు కాంగ్రెస్ నాయకులు కూడా హాజరయ్యారని గుర్తుచేశారు. అప్పట్లో ఎలాంటి వివాదం లేదని, ఇప్పుడు సోషల్ మీడియాలో విమర్శలు చేస్తున్నవారికి సరైన గుర్తింపు కూడా లేదని వ్యాఖ్యానించారు.