కరీంనగర్ అభివృద్ధి పనులను అడ్డుకుంటే ఊరుకోం - బండి సంజయ్

కరీంనగర్ జిల్లాలో రూ.4 కోట్ల వ్యయంతో చేపట్టనున్న అర్బన్ డెవలప్‌మెంట్ పనులకు సోమవారం కేంద్రమంత్రి బండి సంజయ్ కుమార్, తెలంగాణ మంత్రి పొన్నం ప్రభాకర్ శంకుస్థాపన చేశారు. ఈ సందర్భంగా మాట్లాడిన బండి సంజయ్.. కేంద్ర, రాష్ట్ర ప్రభుత్వాలు సమన్వయంతో పనిచేసినప్పుడే అభివృద్ధి సాధ్యమవుతుందని అన్నారు. కరీంనగర్ డంప్ యార్డ్ సమస్యను పరిష్కరిస్తామని హామీ ఇచ్చారు. ఈ సమస్యను రాజకీయ వివాదంగా మార్చవద్దని సూచించారు. జిల్లాలో అభివృద్ధి పనులకు కొందరు అడ్డంకులు సృష్టిస్తున్నారని ఆరోపిస్తూ, అభివృద్ధికి సహకరించాల్సిన సమయంలో ఆటంకాలు కల్పించడం సరికాదని అన్నారు.

కాంట్రాక్టర్లను భయపెడితే అభివృద్ధి పనులు ముందుకు సాగవని కేంద్రమంత్రి పేర్కొన్నారు. కరీంనగర్ పేరును దెబ్బతీసేందుకు కొందరు ప్రయత్నిస్తున్నారని ఆరోపించారు. చిల్లర రాజకీయాలకు స్వస్తి పలకాలని సూచించారు. అభివృద్ధి పనులను అడ్డుకుంటే ప్రజలు సహించరని, అలాంటి చర్యలను చూస్తూ ఊరుకోబోమని బండి సంజయ్ హెచ్చరించారు. జిల్లా అభివృద్ధి కోసం రాజకీయాలకు అతీతంగా అందరూ సహకరించాలని, చేపట్టిన పనులు సజావుగా పూర్తయ్యేలా నిర్మాణాత్మకంగా వ్యవహరించాలని ఆయన పిలుపునిచ్చారు.