సోనియా పుస్తకంపై బీజేపీ విమర్శలు...ఆమె ఏమన్నారంటే?

తన ఆత్మకథ బిలాంగింగ్: ఏ జర్నీ ఆఫ్ లవ్ విడుదలకు ముందు కాంగ్రెస్ పార్టీ అగ్ర నాయకురాలు సోనియా గాంధీ కీలక విషయాలను వెల్లడించారు. ఈ పుస్తకాన్ని ఎలాంటి రాజకీయ ప్రయోజనాల కోసం రాయలేదని, ఇది పూర్తిగా వ్యక్తిగతమైన రచన అని స్పష్టం చేశారు. తాను ప్రేమించే కుటుంబాన్ని నిజాయితీగా చిత్రీకరించడంతో పాటు, తన జీవిత అనుభవాలను పాఠకులతో పంచుకోవాలనే ఉద్దేశంతో ఈ ఆత్మకథను రాసినట్లు తెలిపారు. నవంబర్ 10న ప్రపంచవ్యాప్తంగా విడుదల కానున్న ఈ 544 పేజీల పుస్తకం గురించి ఆంగ్ల దినపత్రిక ది హిందూలో రాసిన వ్యాసంలో ఆమె వివరించారు. తన కుటుంబం గురించి చాలామంది రాసినప్పటికీ, కుటుంబ సభ్యుల వ్యక్తిత్వాలు, ప్రేరణలు, పోరాటాలు, సహజమైన లోపాల గురించి లోతుగా వివరించిన వారు చాలా తక్కువని సోనియా పేర్కొన్నారు. అందుకే తన కుటుంబాన్ని నిజాయితీగా ఆవిష్కరించాలనుకున్నట్లు తెలిపారు.

గత ఐదు దశాబ్దాలుగా తాను చూసిన భారతదేశాన్ని కూడా పాఠకులతో పంచుకోవాలనే ఉద్దేశంతో ఈ పుస్తకాన్ని రచించినట్లు సోనియా గాంధీ వెల్లడించారు. బిలాంగింగ్: ఏ జర్నీ ఆఫ్ లవ్లో తన వ్యక్తిగత ప్రయాణంతో పాటు, తాను ఇల్లు అని భావించే ప్రాంతాల గురించి వివరించినట్లు చెప్పారు. హార్పర్‌కాలిన్స్ ఇండియా ఈ పుస్తకాన్ని ప్రచురిస్తోంది. మరోవైపు, ఈ ఆత్మకథలో వ్యక్తిగత విషయాల కంటే రాజకీయ విమర్శలే ఎక్కువగా ఉన్నాయని బీజేపీ ఆరోపిస్తోంది. పుస్తకంలోని రాజకీయ అంశాలపై ఆ పార్టీ విమర్శలు చేస్తోంది. ఈ నేపథ్యంలో తన రచన రాజకీయాలకు సంబంధించినది కాదని, ఇది తన జీవితాన్ని, కుటుంబాన్ని ప్రతిబింబించే వ్యక్తిగత ఆవిష్కరణ మాత్రమేనని సోనియా మరోసారి స్పష్టం చేశారు.